Skip navigation.
Home

Demonstration pro interlingua in Svedia

  "Interlingua es le lingua le plus facile in le mundo," sonava le megaphono, quando le participantes del 10-me incontro nordic de interlingua in le citate svedese Vadstena sabbato le 29 de julio iva in un demonstration spectacular a transverso del urbe.

Le "demonstration" esseva un happening spontanee pro crear attention a interlingua. Isto succedeva grandemente. Al via a transverso del citate idyllic al ripa del laco Vättern, le demonstration esseva vermente remarcate, durante que centos de brochures esseva distribuite a personas passante e sedente in restaurantes e essente in le botecas. Toto esseva recipite con interesse, e plures mesmo prendeva photos del demonstration que iva del schola Vadstena Folkhögskola al Castello de Vadstena, ubi le participantes esseva a un tour guidate. Post le tour, le demonstration retornava preter le laco, e de novo le gente se levava pro ascoltar e reguardar.

Como se vide in le photo, in fronte esseva le vice-secretario del Societate Svedese pro Interlingua, Erik Enfors, con un grande signo e le vice-presidente del SSI, Bengt Enqvist, con le megaphono.

Initio del pagina