|
 |
Le UMI - un parapluvia mundial de organisationes
Representantes e representationes in cinque continentes labora pro diffunder
interlingua e le uso active de illo.
Le
Union Mundial pro Interlingua (UMI) es un organisation international
que ha membros e representationes in cinque continentes. Le
organisation labora pro unir le nationes in un melior comprension
international per contactos plus directe inter le populos.
Desde novembre 2022, quando le
statutos del UMI esseva cambiate, le Consilio de Administration
consiste de un presidente, un secretario general, un
vice-secretario e un administrator e consilieros ordinari (usque a 9
personas). Illes prende cura del activitates quotidian e strategic del
UMI.
Le UMI publica le magazin bimensual, Panorama in
Interlingua, con informationes international in interlingua pro un publico global:
jornalismo, novas, reportages, interviews, recensiones de libros, e con foco special al
diffusion de interlingua e novas de interlingua globalmente. Le UMI ha associationes e
organisationes national de interlingua que labora in un longe serie de paises.
Quando le prime conferentia international de interlingua esseva arrangiate
in 1955,
le Union Mundial pro Interlingua (UMI) esseva fundate.
Isto occurreva a un session le 28 de julio 1955 al Hôtel de Ville in Tours, Francia. Le
signar del statutos del UMI a pena durava dece minutas. Un trentena de personas ab
Danmark, Francia, Grande Britannia, SUA, Svedia, Venezuela e Suissa esseva assemblate pro
le prime conferentia international de interlingua ) de facto appellate un
"congresso" ) in le citate francese Indre-et-Loire, vicin al urbe Tours. Le UMI
appunctava le suisso André Schild como su prime
secretario general e le statounitese Alexander Gode
como su prime presidente. Alexander Gode esseva plus tarde redactor in chef del
"Interlingua-English Dictionary", publicate in 1951, e le ultime gerente del
labor del "International Auxiliary Language Association". Ille esseva in ultra
co-fundator e prime presidente del Association de Traductores American, que plus tarde le
honorava pro su grande labor.
Interlingua - communication sin frontieras
Interlingua es comprensibile a prime vista pro centos milliones de personas in tote le
mundo - immediatemente e sin studios anterior.
Interlingua es le international lingua auxiliar, le standardisation del linguas romanic e
anglese - e assi del vocabulario international del scientia e technologia.
Interlingua functiona in exactemente le mesme situationes como un lingua national e es
usate in tote connexiones possibile: pro contactos personal e professional, in libros
(belletristica e litteratura professional e traducite), in periodicos e magazines, in
conferentias e congressos international, pro scopos touristic, in materiales de museos, in
gruppos de studio, pro summarios in publicationes national, pro cantos e musica etc.
Interlingua es le resultato de 27 annos de labor scientific e professional.
Interlingua esseva publicate in 1951 per le Association de International Lingua Auxiliar
(IALA). IALA consisteva de organisationes international, de scientistas e linguistas
professional ab tote le mundo, qui laborava con le lingua inter 1924 e 1951.
In 1951, interlingua esseva publicate in le "Interlingua-English Dictionary"
que sempre es supplementate. Le dictionario le plus grande in interlingua a un lingua
national comprehende circa 45.000 entratas.
Le vocabulario de interlingua es a 100% natural e absolutemente international. Con le
septe major linguas cultural como base (anglese, germano, francese, espaniol, portugese,
italiano e russo), un parola debe exister in le mesme forma in al minus tres del linguas
pro esser introducite in su forma standardisate in le vocabulario de interlingua - un
garantia contra parolas inventate e un garantia contra deformationes in le vocabulario
international de interlingua. Le internationalitate es de grande adjuta pro comenciantes
qui studia le lingua: illes recognosce le majoritate del vocabulario ab lor linguas
materne o ab parolas estranier de lor linguas materne.
Le grammatica de interlingua se basa sur le grammatica international e es absolutemente
regular. Il non ha exceptiones irregular. Revidite: 2022-11-20
|
|
|
