Le UMI: Presidentes e
secretarios general

Le posto como presidente del UMI esseva vacue post le morte de Alexander Gode in 1970. Le labor practic esseva ponite in le secretariato general, e solmente durante le 11-me Conferentia International de Interlingua in Borne, Nederland, in julio 1993 esseva appunctate un nove presidente, Leland B. Yeager ab le SUA. Ille totevia besoniava alcun menses pro considerar le offerta, proque ille debeva finir duo libros de economia ante de retirar se como professor universitari.

Le statutos del Union Mundial pro Interlingua (UMI) esseva revidite in junio 1992 pro obtener un organisation plus moderne e plus efficace. Le nove statutos assecura plus de collaboration international e fortifica le gerentia del organisation.

Le statutos es le resultato del labor de un commission special, dirigite per Ton van den Berg, burgomaestro del urbe nederlandese Heino e presidente del Societate Interlingua-Nederland. Le statutos esseva acceptate per omnes minus un consiliero del UMI. Intra tres annos le representationes national de interlingua debeva conformar se al statutos. Illos fixa que le UMI es un "organisation international, sin scopos lucrative, cuje fin es le promotion e le diffusion de interlingua", describite como "le lingua international publicate in 1951 per le International Auxiliary Language Association (IALA)'".

Le UMI functiona como un cappello pro le sectiones national. Le UMI debe incoragiar e assister a nove organisationes national, promover libros de studio, manuales, brochures e revistas in interlingua, organisar conferentias e dar informationes super le lingua.

Le Consilio Executive prende cura del cargas quotidian e consiste del presidente, del secretario general, del vice-secretario e del tresorero. Illes es eligite per le Consilio General pro sex annos.

Le presidente e le secretario general ha al mesme tempore le simile functiones in le Consilio General que consiste de un-duo personas appunctate pro sex annos per le sectiones national, i.e. le organisationes national pro interlingua. Le Consilio General se reuni al minus un vice per duo annos e labora in ultra per medio de communication scripte, organisate per le secretario general. Es anque le carga del Consilio General instituer commissiones de certe themas, si isto es necessari. Le Consilio General es responsabile del affaires general del UMI e le collaboration inter le UMI e le sectiones national. Illo anque debe elaborar le budget del UMI.

Le presidente e secretario general signa omne documentos official del UMI. Le secretario general es in ultra responsabile de preparar e executar le decisiones del Consilio General e reporta super le activitates. In ultra ille nomina nove representantes de interlingua. Le vice-secretario assiste in iste labores e substitue le secretario general quando besoniate.

Le nove statutos anque fixa que le conferentias es un foro pro discuter le progressos de interlingua, facer propositiones, etc. Le conferentias assi non es assembleas plenari ma un "organo avisatori al Consilio General". Omnes qui accepta le statutos del UMI pote esser membros.

Revidite: 2011-08-12

Redaction: Th. Breinstrup, Ingvar Stenström e Jesper Olsson
Copyright © 2001-2011 Union Mundial pro Interlingua