Portrait del organisationes
de interlingua

UNION MUNDIAL PRO INTERLINGUA: UMI es un organisation international que ha membros, representantes e representationes in cinque continentes. Le organisation labora pro unir le nationes in un melior comprension international per contactos plus directe inter le populos.

UMI functiona como un cappello pro le organisationes e societates national pro coordinar le promotion e diffusion de interlingua.
UMI esseva fundate le 28 de julio 1955 in Tours, Francia, durante le prime congresso de interlingua. Le organisation esseva reorganisate e le statutos revidite in 1970 justo ante le morte del prime presidente, le statounitese Alexander Gode. In 1992 le statutos esseva modernisate e effectivisate. Hodie le consilio executive (le presidente, secretario general, vice-secretario e tresorera) gere le affaires quotidian, e le consilio general (con representantes ab le organisationes national) fixa le grande lineas in le labor.

UMI edita desde januario 1988 Panorama in interlingua (ISSN 0903-2932). Illo presenta informationes international in interlingua pro un publico global: jornalismo, novas, nove libros, novas de interlingua, litteratura, amusante enigmas. 28 paginas A5 cata secunde mense, ben illustrate e totalmente in interlingua.

Presidente: Sven Frank, Germania
Secretario general: Carlos Soreto, Portugal
Vice-secretario: Martijn Dekker, Nederland
Tresorero: Alberto Mardegan, Finlandia
Redactor del Panorama: Thomas Breinstrup, Danmark
    

UNION BRASILIAN PRO INTERLINGUA: (União Brasileira pró Interlingua) fundate durante le prime Congresso Brasilian de Interlingua le 28 de julio 1990. Labora in omne paises sudamerican pro inseniar e divulgar interlingua. UBI arrangia annual conferentias brasilian e ha representantes in cata stato brasilian.

Le bulletin official del UBI, le mensual "Internovas" (ISSN 0103-8648), esseva fundate in januario 1990. Internovas es redigite in portugese e interlingua e contine novas, cultura, litteratura, litteratura e articulos super America del Sud e le labor pro interlingua in le continente sudamerican; illo appare solmente in forma electronic.

Presidente: Ramiro B. de Castro
Secretario: (vacante)
Tresorero: (vacante)
  

ACADEMIA INTERLINGUISTIC BULGARE: (AIB) labora in Bulgaria pro diffunder le cognoscentia a e uso de interlingua. Fundate in 2000.

Presidente: Petio Angelov
Tresorero: Mirena Cherneva
Bibliothecario: Nikola Seimenov
  

SOCIETATE AMERICAN PRO INTERLINGUA: lege plus ci

(Antea: UNION CANADIAN PRO INTERLINGUA: labora desde 1993 in Canada pro diffunder le cognoscentia e uso active de interlingua.
Editava desde le hiberno 1992 "Vias boreal" in interlingua que informava super le vita actual in Canada e presentava punctos de vista canadian a eventos international. 4-6 paginas A4 in cata numero, plus tarde solmente in version electronic.)

UNION DANESE PRO INTERLINGUA: (Dansk Interlingua Union)
establite le 7 de novembre 1960. Labora in Danmark e le paises nordic, ubi non ancora existe representation national de interlingua (p.ex. Islanda), pro diffunder le cognoscentia e uso de interlingua.
Edita - in collaboration con le Societate Svedese pro Interlingua, le Union Norvegian pro Interlingua e le Association Finlandese pro Interlingua - le trimestral "Actualitates - Interlingua i Norden" (ISSN 1395-2455) con articulos in danese, svedese, norvegiano e interlingua.

Presidente: (Vacante)
Vice-presidente: Bent Andersen
Secretario: Thomas Breinstrup
Tresorero: Dan Sterup
      

ASSOCIATION FINLANDESE PRO INTERLINGUA: (Suomen Interlinguayhdistys, SILY; Föreningen för Interlingua i Finland, FILF) labora desde le 24 de junio 1998 in Finlandia pro diffunder interlingua e le uso active del lingua. SILY es co-editor del magazin nordic Actualitates - Interlingua i Norden que appare omne tres menses in le linguas nordic e interlingua.

Presidente: Allan Kiviaho
Secretario: Brita-Lisa Kiviaho
Tresorero: (vacante)
    

UNION INTERLINGUISTE DE FRANCE: (Union Interlinguista de Francia) establite in 1961. Labora in Francia pro diffunder le cognoscentia e uso active de interlingua. Edita le magazin trimestral Unir (ISSN 0985-1798) in francese e interlingua, establite in 1961.

Presidente: Jeanne Martinet
Vicepresidente: Alix Potet
Secretaria: Madeleine Mahé
Tresorero: Michel Prim
   

SOCIETATE BRITANNIC PRO INTERLINGUA: (British Interlingua Society) establite in 1956. Labora in Grande Britannia e le mundo anglophone pro diffunder le cognoscentia e uso active de interlingua.
Edita omne quatro menses - antea in collaboration con le ora claudite Interlingua Institute, SUA - le magazin transatlantic Lingua e Vita con articulos in anglese e interlingua. Illo appare desde junio 1965 (antea como "Littera Circular").

Le BIS anque edita omne quatro menses Contacto - magazine informative super Interlingua (ISSN 1356-0018), fundate in julio 1994, con articulos, informationes, explicationes e responsas de interlingua e su organisation in anglese con textos parallel interlingua-anglese.

Presidente e tresorero: Peter Gopsill
Secretario: Brian C. Sexton
   

SOCIETATE AMERICAN PRO INTERLINGUA: lege plus ci
   

SOCIETATE INTERLINGUA-NEDERLAND: (Vereniging Interlingua-Nederland) establite in 1989. Labora in Nederland, Belgica e Luxembourg pro diffunder le cognoscentia e uso active de interlingua. Edita desde 1990 le trimestral Voce de Interlingua in nederlandese e interlingua.

Presidente (temporari): Piet Cleij
Secretaria: Elly Engel-van Amersfoort
Tresorera: Franske Persijn-Jorritsma
   

UNION NORVEGIAN PRO INTERLINGUA: (Norsk Interlingua Union) fundate le 1 de maio 1992. Labora in Norvegia pro diffunder interlingua e le uso active del lingua. NIU es co-editor del revista commun nordic "Actualitates - Interlingua i Norden", que appare omne tres menses in le linguas scandinave e interlingua.

Presidente: Roger A. Rognaas
Secretario: Magne Heie
Tresorero: Rolf A. Røkeness
  

ASSOCIATION ROMANIAN PRO INTERLINGUA: (Asociatia Româna pentru Interlingua) esseva fundate in connexion con le 14-te Conferentia International de Interlingua in Focsani in julio 1999. Le ARPI labora pro diffunder interlingua in Romania e ha contactos al altere paises balkanic.

Presidente: Simona Sunel
Secretario: Florin Patras
Tresorero: Arabela Matei
  

SOCIETATE AMERICAN PRO INTERLINGUA: (SAI) esseva establite in le fin de 2001 pro avantiar le studio, uso e beneficios de saper e usar interlingua in America del Nord. Membros habita in le Statos Unite de America, Canada e Mexico. Le SAI edita le magazin trimestral Confluentes.

Le nove organisation esseva establite per veteranos e nove interessatos post le clausura in 2000 del Interlingua Institute. Le Interlingua Institute esseva establite in le initio de 1970 per Alice M. Sturges, Henry Fischbach, Alexander Gode e le "Alice V. and Dave H. Morris Memorial Fund" con Alexander Gode como su prime director executive usque a su morte in augusto 1970. Pois su sposa, Alison, se cargava del labor. Le predecessor esseva le American Interlingua Society, establite post le dissolution del "Interlingua Division of Science Service"; illo functionava usque al morte de Hugh E. Blair in januario 1967. Le Interlingua Institute laborava in le Statos Unite de America e Canada.

Presidente: Stanley Mulaik
Secretario e tresorero: Paul May
  

UNION INTERLINGUA DE HELVETIA: (UIH) esseva establite in Bern in 1969. Labora in Suissa e - pro le momento - anque in Italia pro diffunder interlingua e le uso active del lingua.

Presidente: Paolo Castellina
  

SOCIETATE SVEDESE PRO INTERLINGUA: (Svenska Sällskapet för Interlingua) fundate le 1 de januario 1964. Labora in Svedia pro diffunder interlingua e le uso active del lingua. SSI es co-editor del revista commun nordic "Actualitates - Interlingua i Norden", que appare omne tres menses in le linguas scandinave e interlingua.

Presidente: (Vacante)
Vice-presidente: Bengt Enqvist
Secretario: Ingvar Stenström
Vice-secretarios: Erik Enfors, Nils Kangas
Informator: Barbara Rubinstein
Tresorero: Mats Fredmark, Esko Kangas
   

SOCIETATE UKRAINIAN PRO INTERLINGUA: (SUI) labora in Ukraina - e in le initio anque in Russia, usque un organisation national essera fundate la - pro diffunder le cognoscentia e uso active de interlingua. Fundate in Odessa le 29 de martio 1994.

Presidente (temporari): Victor Sitnichenko

Revidite: 2009-09-22