Hugh Edward Blair

Statos Unite de America
Nascite: 23 de maio 1909 - 28 de januario 1967

Hugh Edward ("Ed") Blair esseva le assistente de Alice V. Morris, le fundatrice del IALA. Ille esseva un membro del equipa recercatori al morte de Alice V. Morris in 1950 e pois deveniva le "mano derecte" de Alexander Gode. Usque a su morte, Blair esseva le plus intime collaborator de Alexander Gode. Hugh E. Blair anque es le co-autor del "Interlingua Grammar".

Hugh E. Blair nasceva quasi sin patre in le stato Georgia, SUA. Su patre esseva un homine choleric qui habeva laborate como ferrator ma finalmente vendeva le sapon magic de Blair a expositiones e representationes in le areas rural. Su parentes divorciava, e Hugh E. Blair viveva con un amita exploitative, qui non le inviava a schola. Quando su matre laborante lo discoperiva, ille esseva inviate a un amita stricte ma plus responsabile. Su matre prendeva su filia con se a Atlanta, ubi illa laborava como operator de tabula de distribution.

Ille graduava del City College e iva al Universitate de Columbia pro studiar linguistica, ma a causa del nascentia del filia Rima ille non obteneva un doctorato.

In un juvene etate, Hugh E. Blair veniva sub influentia del familia Sultzberg, le possessores del jornal New York Times e del Chatanooga Times, pro qui ille faceva dactylographiation durante su tempore gymnasial. Ille debe haber apparite como un infante multo inusual del statos sud. A ille tempore ille anque deveniva ardentemente pro-Gandhi e anti-Scopes (le si-appellate creationistas) e esseva avisate de quitar le urbe, durante que ille poteva. Le editor del jornal avisava le matre de Hugh E. Blair que ille haberea nulle futuro intellectual in Georgia, e ille iva al nord.

In New York, ille laborava al Works Progress Administration. Le WPA esseva un initiativa, que in 1935-1943 offereva labor al disoccupates per usar moneta in un grande numero de areas. Hugh E. Blair condensava e simplificava le vocabulario de classicos pro immigrantes e adultos qui luctava con analphabetismo. 

Como resultato del contactos con editores de jornales, le familia obteneva un abonamento a mensual equipamento scientific pro infantes.

"Esseva como obtener un batteria de chimia per posta cata mense - grande amusamento e illo probabilemente me adjutava de adjustar me al schola scientific que io frequentava," narra Rima Blair. "Illo esseva un de tres tal scholas in le urbe a ille tempore que admitteva pueras. On ganiava admission per prender un test competetive. Non surprendente pro 1957, il habeva cinque pueros pro cata puera qui entrava. Mi patre esseva un inseniator sensitive e plen de ressources."

Ille esseva un linguista talentose, qui poteva leger 13 linguas, e un scholar extraordinari. Ille esseva quiete de natura e viveva assi in le umbra de su chef, Alexander Gode-von Aesch, mesmo si Hugh E. Blair esseva parte del majoritate del labores basic de interlingua.

Ille possedeva un large collection de libros super linguas e le placeva multo scriber poesia in altere linguas e traducer poesia de latino, espaniol e chinese in anglese.

"Ille un vice emergeva del camera combinate como officio, camera a dormir e camera a mangiar de mi parentes, cantante que ille habeva justo scribite su prime poema in chinese, e io es secur que isto non esseva su ultime. Io crede que ille credeva que finalmente scientistas voleva routinarimente communicar in interlingua. Ille habeva un curiositate insatiabile e un ric vita imaginative interior," le describe su filia, Rima Blair.

Ille esseva un alte homine densemente construite con un memoria photographic. Assi ille poteva citar quasi tote lo que ille habeva legite, parola post parola. Le filio Richard Blair narra:

"Io esseva multo proxime a mi patre e usava duo-tres horas per nocte durante mi infantia pro esser educate per ille. Ille me adjutava con mi deberes scholar e poteva esser un referentia digne de confidentia de quasi cata subjecto. Quando mi interesses in un subjecto cresceva, io continuava trovar difficile superpassar Ed in mesmo le subjectos le plus specialisate."

Hugh E. Blair Le photo de 1939 es ponite a disposition per Richard Blair, filio de Hugh E. Blair. - Clicca al photo pro vider lo in grandor plus large.

Ille laborava pro salarios quasi al puncto de fame, e su infantes - le filia Rima e le filio Richard - esseva supportate primarimente per lor matre, Anna Blair, qui laborava a un station de radio como director de publicitate e secretaria; Anna e Hugh E. Blair se maritava al anniversario de ille. Ambe le infantes veniva al labor de lor patre. Al etate de 16 annos, Richard laborava in le officios del International Auxiliary Language Association imprimente materiales de interlingua con un machina de mimeographia que usava stencils de cera. Illes anque visitava Alexander Gode in su casa in le belle area rural, e Richard habeva un lection de conducer auto in le etate de 12 annos.

Alexander Gode mesme scribeva in "Novas de Interlingua" (2/1967) super le morte de su collega:

"Blair esseva un large homine. Al fin su peso esseva troppo pro su corde. Ille esseva large e lente e simple e bon. Il esseva bon vider le felice. Ille non semper lo esseva. Ille amava le sol, le aves, bon vino, poesia. Un specie de Sancte Francisco secular.
Le interesses de Blair esseva multiple. Su cognoscentias esseva enorme. Su disciplina, su maestria de se ipse esseva nil. Mi rolo - a vices brutal - esseva exploitar le grandissime potentialitates de Blair le quales ille mesme haberea guastate. Io me reguarda como amico sue. A vices - non semper - ille reciprocava."

Quando IALA esseva claudite le 31 de martio 1953, Hugh E. Blair accompaniava Alexander Gode al Division de Interlingua sub Science Service. Ci ille, con Gode, redigeva le nove magazin "Novas de Interlingua" - le successor natural de "Novas de IALA" - con un comité redactional international con membros in Suissa, Italia, Francia, Danmark, Grande Britannia, Canada e le SUA.

Isto ille quitava in le fin de 1955 pro startar su proprie firma. Ille esseva le secretario pro American Interlingua Society e redactor del magazin del societate, "Interlingua at Work".

Hugh E. Blair habeva un mal sanitate in su dies vetere. Ille habeva diabete e debeva mangiar cosas sucrate pro mantener su energia a causa de un metabolismo mal.

In le medio del 1960s, Hugh E. Blair deveniva active in le movimento de rebelles, "The Beats", un gruppo de bon amicos e poetas/novellistas influential. Ille exercitiava pro un pecia scribite in anglese medieval e deveniva multo popular in le rolo. Ille esseva incoragiate a continuar e appareva in multe productiones monstrate al Judson Memorial Church, que habeva un spatio de presentation e multe lecturas de poesia. Hugh E. Blair mesme scribeva poesia e deveniva popular al lecturas de poesia. Ille startava un gruppo, "Poets on the Pier" (Poetas al Pila), ubi poetas poteva leger in aere libere sur un pila vicin al Riviera Hudson. Ille mesmo habeva un grande hamo usate si alcuno non poteva stoppar parlar. Usque a 500 personas attendeva le sessiones.

Alexander Gode describe le scenario assi ("Novas de Interlingua", 2/1967):

"Le dominicas, in estate, al Gansevoort Pier in basse Manhattan, Blair congregava su amicos - pueros, adultos, narcomanos, poetas, bourgeois - a cantar e a leger poesias a alte voce - contra le undas del Hudson, le sirenas del vapores, le trompas de autos.
Le sabbatos - a vices etiam le venerdis. mercuridis, martedis. lunedis - in hiberno e estate, le sessiones de lectura de poesias (organisate per Blair) se faceva alterubi. Il esseva durante un tal que le corde de Blair falleva. Nos alteros lo habeva previdite, sed non esseva preparate."

Ille moriva a un lectura de poesia per un colpa cardiac. Postea, un libro con su poesia esseva producite per su sposa e su filio Richard, qui anque labora - como su patre - con publicationes e es un eminente photographo. Richard Blair ha con su sposo Kathleen Goodwin, qui esseva jornalista in Africa del Sud, publicate un libro del area in le SUA, ubi illes habita, Point Reyes. Le libro, "Point Reyes Visions", es un bestseller.

Autor: Thomas Breinstrup
Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua