Historia de interlingua
INTERLINGUA IN NORVEGIA

Calor cypriota e articulo
danese aperiva Norvegia

Un curso estive in Cypro e un articulo de Danmark eveliava le norvegianos, qui in 1992 fundava le Union Norvegian pro Interlingua. Le cofundator e prime presidente del NIU narra ci le historia.

Per Åsmund Knutson

Le Union Norvegian pro Interlingua (in norvegiano: Norsk Interlingua Union) esseva fundate per Ole e Dagrun Øiseth e le suprasignate a un incontro le 27 de april 1992 con data official le 1 de maio. Nos habeva, ab cata de nostre loco, sentite le besonio de un departimento norvegian del labor. Ole e Dagrun Øiseth esseva membros del Societate Svedese pro Interlingua, io del Union Danese pro Interlingua. Nos establiva, in collaboration con le SSI e DIU, un consilio temporari del NIU con Ole e Dagrun Øiseth como secretariato e le suprasignate como presidente.

Le prime carga esseva prender contacto con le norvegianos qui ja esseva membros del SSI. Io mesme esseva le sol membro del DIU. E tosto nove membros veniva. Al 12 de maio 1992 nos ja habeva dece-tres membros.

Inspiration de Cypro

Ole e Dagrun Øiseth esseva pensionarios, e illes sovente iva al sud pro vacantias hibernal. Durante le tempore ante le pascha 1991 illes esseva in Cypro. La illes incontrava Pian Boalt, un ardente enthusiasta de interlingua, qui arrangiava un curso de interlingua al location. Ole e Dagrun Øiseth participava, e illes deveniva le amicos proxime e car de Pian Boalt. Al curso illes apprendeva interlingua per le manual "Interlingua - instrumento moderne de communication international" per Ingvar Stenström.

Ole Øiseth particiva in le 10-me Conferentia International de Interlingua, que durava un tote septimana, e que esseva arrangiate in Helsingborg in 1991. La ille incontrava multe personas commode e interessante. Ille esseva le prime norvegiano, qui participava in un international conferentia de interlingua.

Circa 10 norvegianos ja esseva membros del SSI. Le quotisation esseva 50 coronas, del quales le 20 dispareva in provisiones a pagamento individual a Svedia. Pro isto esseva decidite que Ole Øiseth aperiva un conto de giro postal in Norvegia, a fin que iste pagamentos iva directemente a ille, assi que ille poteva expedir le amonta total al SSI cata anno.

Isto es mentionate in un littera ab Ole e Dagrun Øiseth al membros, datate le 30 de octobre 1991. A un certe mesura on pote dicer que le NIU ja habeva comenciate su activitate.

A iste tempore, Ole e Dagrun Øiseth ja habeva comenciate traducer le danese mini-dictionario de 2.000 parolas in norvegiano, e le DIU voleva imprimer lo. Illes in ultra esseva fervidemente ingagiate in correspondentia con le membros e le recrutamento de nove membros, e quando illes iva a lor viages verso le sud, le membros esseva informate de lor adresse. Io mesme esseva contactate per illes in octobre 1991, pois que illes sapeva que io esseva un membro del DIU.

Articulo hyper-interessante

Io esseva interessate in esperanto e omne sorta de international linguas auxiliar. Al Laboratorio Stratal, ubi io laborava, io habeva demandate al bibliothecario cercar litteratura super tal themas. Isto esseva in le tempore ante que Internet deveniva accessibile, al minus pro me. Alora illa, le bibliothecario, un die veniva con un articulo de un magazin norvegian super Scientia Popular (Populær Vitenskap), in le qual interlingua esseva describite.

Esseva Thomas Breinstrup, qui habeva scribite le articulo. Io esseva absolutemente capturate. Isto esseva hyper-interessante. Io prendeva contacto con DIU e deveniva membro in 1990. Io recipeva Panorama, Actualitates, le curso de interlingua per Thomas Breinstrup etc., etc. e lo attaccava. Io essayava interessar le gente circum me e habeva visiones plus grande que io poteva caper. Io ordinava litteratura de interlingua in martio 1990 e esseva in plen velocitate studiante lo in le medietate de martio. DIU se preoccupava ben de me e me provisionava con tote lo que io besoniava.

Io participava in mi prime incontro scandinave de interlingua in Helsingborg in 1992 e habeva un experientia phantastic de benvenita, fide e amicitate. Anque in 1994 io participava in le incontro scandinave in Helsingborg.

Le labor in le NIU

Durante le annos sequente, Ole e Dagrun Øiseth esseva immensemente active. Illes traduceva vocabularios e le manual de Ingvar Stenström. Nos anque traduceva le curso postal de octo lectiones per Peter Gopsill e lo inviava al membros. Nos iva al jornales con interviews e information. Mesmo le primeministro, Gro Harlem Brundtland, recipeva un littera de nos. Durante un periodo io redigeva un parve jornal interne pro le NIU. Io lo nominava Internovas de Norvegia. In martio 1995, le numero de membros habeva attingite 32, e nos habeva habite assatis multe membros specialmente qualificate.

Io deveniva coredactor de Actualitates. Ma mi labor al Laboratorio Stratal deveniva sempre plus demandante, e il me deveniva de plus in plus clar que io non maneava plenar le posto como presidente del NIU assatis ben. Dunque de 1995, Arvid Eriksen se declarava preste a acceptar le presidentia. Ole e Dagrun Øiseth continuava como secretariato, usque Arvid Eriksen establiva un nove vicin a su casa.

Ole Øiseth moriva le 14 de april 1998. Al conferentia de interlingua in Helsingborg nostre dolor esseva marcate per un breve silentio. Presente esseva anque pro le prime vice Steinar Midtskogen, un intelligente juvene, qui pote adjutar al futuro de interlingua.

In novembre 2001, Åsmund Knutson reassumeva le posto como presidente del NIU post haber essite pensionate de su labor.

Revidite: 2008-08-10

Cerca le Historia de interlingua per FreeFind

FACTOS

Le Union Norvegian pro Interlingua (Norsk Interlingua Union) esseva establite le 1 de maio 1992.

Presidentes:
Åsmund Knutson (maio 1992-1995)

Arvid Eriksen (1995-novembre 2001)

Åsmund Knutson (novembre 2001-decembre 2007)

Roger A. Rognaas (januario 2008-)

Secretario/ tresorero:
Ole e Dagrun Øiseth (maio 1992-1998)

Ruth Knutson (novembre 2001-decembre 2007)

Secretario
Magne Heie (januario 2008-)

Tresorero
Rolf A. Røkeness (januario 2008-)