Ole e Dagrun Øiseth durante le Tertie Incontro Nordic de Interlingua in 1992. Photo: Thomas Breinstrup

Ole Øiseth

Norvegia
Nascite: (non cognite)
Morite: (non cognite) 1998

"Le norvegiano historic" esseva lo que Ole Øiseth esseva appellate.

Esseva gratias a Pian Boalt, que Ole e su sposa Dagrun obteneva contacto con interlingua. Ole deveniva le norvegiano historic, nam ille esseva de facto le prime norvegiano a interessar se activemente pro interlingua. Ille participava in le 10-me conferentia international de interlingua in Helsingborg in 1991 e in le 3-tie incontro scandinave de interlingua in 1992, anque in Helsingborg. Le participantes appreciava su attitude positive, su energia impressionante, su compania commode – e su interesse genuin pro interlingua.

Ole Øiseth esseva co-fundator del Union Norvegian pro Interlingua, establite le 1 de maio 1992, e deveniva – con Dagrun – le secretario e tresorero del NIU.

Insimul con Åsmund Knutson, prime presidente del NIU, Dagrun e Ole Øiseth elaborava un version norvegian del manual famose "Interlingua – instrumento moderne de communication international" per Ingvar Stenström, e illes anque elaborava le manuscripto pro un ample dictionario norvegian de interlingua.

Ole Øiseth moriva in maio 1998 post un longe maladia dolorose que ille supportava con un stoicismo incredibile.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua