Historia de interlingua
Biographias A-Z

Pian Boalt

Svedia
Nascite: 27 de februario 1925

Pian Boalt, Helsingborg, julio 1992. Photo: Thomas BreinstrupLe svedeses ha livrate multe talentos a interlingua. Le plus eminente, diligente e productive traductor es Pian Boalt. Su contributiones al litteratura traducite in interlingua es remarcabile. Ha apparite un serie de autores primarimente italian (nam italiano es multo vicin al corde de Pian Boalt) – un serie cuje linguage reflecte multo ben le professionalismo e qualification de Pian Boalt.

Illa nasceva in Stockholm le 27 de februario 1925. Illa es phil. cand. in linguas nordic (islandese antique, svedese antique, danese, norvegiano), italiano e pedagogia e ha examine de phil. lic. in islandese antique. Su studios universitari comprehendeva anglese, romaniano, gothico, neogreco, psychologia e sociologia.

Illa esseva redactor al casa editorial Natur och Kultur 1954-1962, al casa editorial Esselte Förlag 1963-1981, co-redactor in chef al casa editorial Focus 1982-1990. Sempre incargate i.a. de productos encyclopedic e linguistic, libros professional universitari e popular, series de guidas geographic. In ultra, illa co-autorava un dictionario svedese-svedese illustrate. E durante le passate annos illa ha laborate con un grandissime dictionario svedese-interlingua que omne interlinguistas nordic attende con impatientia.

Su interesses es linguistica, belles-lettres, archeologia, architectura, historia del arte, musica, botanica, montanias, desertos, vita marin, broderia e viages. Ultra le major parte del paises europee illa ha viagiate in plures del Statos Unite, Mexico, Marocco, Egypto, Israel, Libano, Syria, Jordania, Pakistan, India e Sri Lanka. Cypro ha un placia central; le medietate del anno illa habita e labora in Agia Napa – i.a. con interlingua.

Revidite: 2006-12-29