Le die mundial pro interlingua

Tote effortios de representantes e interessatos es colligite le 15 de januario cata anno pro attraher le attention del mundo a interlingua.

  Le 15 de januario es cata anno le international Die de Interlingua. In tote le mundo organisationes e representantes de interlingua insimul con le membros face a iste die qualcosa extra pro attraher le attention a interlingua.

Desde 1992 le die de interlingua ha essite arrangiate cata anno. Le intention es colliger un serie de activitates parve o plus grande a precisemente iste data, nam multe parve rivettos pote, como on sape, devenir un fluvio spumante. Omnes es pro isto incoragiate a facer un effortio special - e preferibilemente public - pro interlingua a justo iste die ... e es permittite prender uso de tote le septimana.

Le propositiones a activitates non solmente vale pro le Die de Interlingua. Illos pote ben esser usate durante tote le anno:

• Contacta le bibliotheca local e recipe del organisation national de interlingua un pila de brochures o lection 1 del gratuite curso de correspondentia que pote esser placiate al bibliotheca.
• Demanda a tu medico o dentista, si tu pote placar materiales informative super interlingua in le camera a attender.
  
• Arrangia un parve exposition super interlingua in le local casa cultural.
• Face un discurso pro un club o simile del qual tu es un membro.
  
• Scribe un (breve) salute de interlingua a un amico, o trova nove contactos de interlingua in Internet (visita p.ex. le Union Mundial pro Interlingua a www.interlingua.com).

Reporta de tu activitates al redaction del Panorama. Usa le formulario Contacto, e invia le message al redaction del Panorama.