Le direction del UMI

  Un equipa international forma le direction quotidian del Union Mundial pro Interlingua (UMI). Le Consilio Executive es eligite pro quatro annos, durante que le consilio general - que consiste de representantes del organisationes national, e que decide super questiones strategic - es eligite pro duo annos. Le Consilio General determina le politica general del UMI.

Tote le labor in le Consilio Executive - como in tote le organisation del Union Mundial pro Interlingua - es facite sin salario.

Le Union Mundial pro Interlingua es un organisation international, sin scopos lucrative, pro promover e diffunder le lingua auxiliar international interlingua, publicate in 1951 per le "International Auxiliary Language Association" (IALA).

Le UMI como organisation non prende positiones super questiones religiose, politic o scientific, ni super ulle altere questiones, con le exception de appoiar e divulgar interlingua. Iste sito offere un selection de documentos in e super interlingua, ma solmente lor autores es responsabile pro lor contentos.

Presentation del Consilio Executive del UMI

Presidente:
Barbara Rubinstein (nascite 1954), dr. odont., Svedia, es desde 2001 le presidente del UMI. Interessate in interlingua desde 1994 e active participante in le conferentias international de interlingua desde 1997.

Secretario general:
Sven Frank (nascite 1975), Germania. Secretario general desde le 1 de octobre 2008. Ille es educate hypnotherapista, gere le instituto ICHP Deutschland in Mannheim e ha scribite anque libros professional de hypnotherapia. Ille usa anque interlingua in su labor quotidian. Ille ha organisate le prime conferentia german pro interlingua in 2008, fundava le instituto de interlingua in Germania e organisa de café interlingua cata mense. Ille ha un filio e parla interlingua a su infante. Sven Frank ha parlate interlingua desde 2002 e parla in ultra anglese, francese, espaniol e svedese - sin mentionar le germano.

Vice-secretario:
Martijn Dekker (nascite 1975), Nederland. Vice-secretario del UMI desde le 15 de septembre 2009. Administrator de systemas computatorial. Active con interlingua desde 2000. Ha traducite software, paginas de Internet, scriptura e redaction de articulos in le encyclopedia libere Wikipedia in interlingua e ha presentate discursos e seminarios in interlingua super themas sin connexion a interlingua a publicos international. Ha participate in numerose conferentias international de interlingua e incontros nordic de interlingua.

Tresorero/aranea:
Alberto Mardegan (nascite 1978), Italia. Tresorero e aranea de www.interlingua.com desde le 1 de januario 2006. Cofundator e prime presidente del organisation Interlingua Italia, establite le 15 de januario 2005. Desde 2003 le representante de interlingua in Italia. Interessato de interlingua desde 2002. Parla italiano, anglese e bulgaro. Frequentava le schola obligatori, pois le lyceo scientific Leonardo da Vinci in Treviso (exiente con un evalutation de 56/60) e alora al universitate de Padova studiante al facultate de mathematica pur e applicate. Su these de laurea esseva scribite in interlingua e esseva evalutate a 105/110, facente le doctor de mathematica. Quasi immediatemente post le fin del universitate empleate como programmator in Sogea, un firma in Treviso que produce software pro interprisas. Desde septembre 2006 empleato presso Nokia in Finlandia.

Associatos distinguite del UMI

Le associatos distinguite supporta interlingua e le labor que face le UMI.

• James M. Buchanan, SUA (professor, receptor del Premio de Nobel in scientia economic in 1986)
• Giovanni Blandino, Italia (professor universitari, philosopho e autor)
• André Martinet, Francia (1908-1999, professor de linguistica)
• Jeanne Martinet, Francia (professor de linguistica)