Historia de interlingua
Biographias A-Z

Alix Potet

Francia
Nascite: le 11 de novembre 1946

Alix Potet, presidente del Union Interlinguista de Francia (UIF) de 1989 a 2002, es professor de informatica al École Centrale de Nantes (antea al universitate U.N.S.M. in Nantes), Francia, ubi le familia habita, e in novembre 1990 illa ganiava su doctorato in scientias. Alix Potet es specialista de intelligentia artificial "sed nos, qui la cognosce, sape que illa ha anque un multo bon portion de intelligentia natural," como fil. mag. Ingvar Stenström, Svedia, lo ha exprimite.

Alix Potet ha - como le resto de su familia - ingagiate se activemente pro interlingua, gratias a su patre, Jean Mahé, qui esseva pionero francese de interlingua. Illa assecurava con su soror Madeleine le arrangiamento practic del 8-ve Conferentia International de Interlingua in Paris, 1987, e in 1997 illa presideva le 13-tie conferentia in Strasbourg, organisate de novo con le adjuta de tote le familia. 

Alix Potet ha mesme participate in omne conferentias desde illo in Danmark in 1985 e es, como su familia, multo appreciate pro le ingagiamento, bon humor, energia, musicalitate e attitude positive verso cata obstaculo. "Nulle problema!" es le responsa prompte de Alix Potet.

In julio 1989 illa esseva eligite membro francese del consilio general del Union Mundial pro Interlingua, e plus tarde le mesme anno illa deveniva anque presidente del UIF con soror Madeleine como secretaria. In augusto 1995 Alix Potet in ultra entrava in le consilio del Fundation Bakonyi pro Lingua Universal (FBLU) que supporta economicamente le publication de libros in interlingua. In le autumno 2002, Alix Potet abandonava post 13 annos le posto como presidente del Union Interlinguista de Francia pro dar le sede a Jeanne Martinet e pro mesme devenir le vicepresidente del UIF.

Su profession como inseniator ha essite de alte valor in le conferentias de interlingua. Illa ha inseniate interlingua al comenciantes de plure conferentias desde 1991, e le materiales de su curso mesmo ha essite usate plus tarde inter scandinavos emigrate temporarimente sur Cypro. Excitante es sempre vider le spectaculo con cantos, versos e representationes que le comenciantes sole facer al ultime vespere de cata conferentia sub instruction de lor professor.

Alix Potet es co-autor del supplemento francophone al manual "Interlingua" per Ingvar Stenström (1988) e le mini-dictionario francese (1991). Illa esseva, in ultra, un de tres judices in le concurso litterari que le UMI arrangiava in 1994.

Revidite: 2006-12-29