|
 |
Mi prime contacto
con interlingua
Panorama ha demandate a un serie de usatores de interlingua, como esseva lor prime contacto con le lingua. Lor narrationes es instructive, a vices curiose, surprendente e amusante.
(Publicate in Panorama in Interlingua, septembre-octobre 2002)
ALIX POTET (Francia), presidente del Union Interlinguista de
Francia:
Alicun annos retro (de facto 19 annos retro, tempore fugit!) mi patre proponeva a mi soror Madeleine de vader a Sheffield, Grande Britannia, con ille pro participar a un conferentia international de iste lingua auxiliar del qual ille quasi non nos parlava:
Interlingua (1983, red.). Madeleine acceptava e vadeva a Sheffield con mi patre e mi filia Gaëlle. Illas reveniva completemente enthusiastic de iste incontro...
E duo annos plus tarde, nos decideva de vader in Danmark, al conferentia de Taastrup con tote le familia! Ibi nos incontrava habitantes de plure partes del mundo. Cata
uno esseva multo attentive al alteres e prendeva multe precautiones pro parlar lentemente con nos, assi que nos poteva comprender le. Io discoperiva le ver placer de poter comprender immediatemente quasi tote le discursos de personas veniente de diverse paises, e mesmo post un septimana, io poteva excambiar plus que simple parolas, io poteva haber conversationes con amicos de lingua maternal incognoscite de me, in Interlingua!
Qual experientia! Io me rememora quanto nos esseva triste de quitar tote nostre nove amicos pro duo annos. Si, io dice "amicos": durante iste septimana que nos passava in un loco admirabile, nos conversava, jocava, habeva multo agradabile tempore e anque laborava, ma in un tal ambiente agradabile que isto non semblava labor. Pro me, parlar in Interlingua esseva como un joco de plus, un nove passo verso le alteres. E durante iste septimana, nos discoperiva le calor de un amicitate ric de su internationalitate.
Revidite: 2006-12-29 |
|
|
