 |
||||||||||||||||||||||||||||||||||||||||||||||||||||||||||||||||||||||||||
 |
||||||||||||||||||||||||||||||||||||||||||||||||||||||||||||||||||||||||||
 |
||||||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||
|
|
 Pierre HumbertFrancia Pierre Humbert, tresorero del Union Interlinguiste de France del autumno 1987 a januario 2002, nasceva in Olley, un parve village de Francia del est, presso le frontiera de Belgica. In le collegio, on apprendeva un sol lingua estranier: le germano. Su provincia es nominate in francese Lorraine (in germano Lothringen, in italiano Lorena). Un parte del provincia parla un dialecto german, ma 4/5 es purmente francese. Multe minatores de ferro veniva ab Italia. E on mangiava le polenta – pappa de mais. Plus tarde ille ha apprendite un poco anglese, latino e espaniol pro accompaniar le studios de su filias – e mesmo italiano pro un viage. "Assi io poteva leger le annuncios, le titulos in le botecas e le museos, salutar – ma non parlar. Io cognosce satis ben le theoria de iste linguas, ma io non ha le tempore de excambiar." Pierre Humbert studeva in le schola primari, ubi su patre esseva director. Pois in le collegio moderne (sin latino) de Longwy, presso le frontiera de Belgica, in le lyceo Henri Poincaré in Nancy, in le Schola Normal (formation de institutores como Jean Mahé) de Nancy, usque 1946. Le lingua scholar esseva germano. Ille inseniava primo francese, historia, geographia in un schola pro infantes (6-11 annos), pois in un collegio (alumnos de 11-15 annos). Pois ille deveniva professor de francese, litteratura, historia e geographia, "dunque io cognosce le altere paises – secundo le libros." In 1979, ille comprava per hasardo un parve libro del collection “Que sape io?” (Que sais-je?) multo popular presso le studentes (editor P.U.F.) no. 968, “Le linguas international”. Le autor Pierre Burney face le revista: latino, francese del 18-e seculo, anglese (con le version basic), linguas create. Un texto permitteva de comparar esperanto, ido e interlingua. Iste ultime placeva a Pierre Humbert: clar, musical. Ma como contactar interlingua? Ille scribeva a plure societates, revistas, editores, sin successo. Al fin ille recipeva un documento e adresses e comenciava su uso de interlingua. Ille trovava correspondentes in altere paises e ha participate in plure conferentias international de interlingua. Pierre Humbert ha essite le redactor de chronicas pro Panorama desde julio 1996, quando illo esseva introducite. Ille ama scriber super themas del vita quotidian in su parte del mundo, como ille anque es un contributor al magazin del UIF, Unir. Revidite: 2006-12-29 |
|
|||||||||||||||||||||||||||||||||||||||||||||||||||||||||||||||||||||||
|
||||||||||||||||||||||||||||||||||||||||||||||||||||||||||||||||||||||||||
| |
||||||||||||||||||||||||||||||||||||||||||||||||||||||||||||||||||||||||||
Redaction:
Th. Breinstrup, Ingvar Stenström e Jesper Olsson |
||||||||||||||||||||||||||||||||||||||||||||||||||||||||||||||||||||||||||
