Historia de interlingua
Biographias A-Z

Brian Carver Sexton

Grande Britannia
Nascite: 27 de julio 1927

Brian C. Sexton, Borne, 1993. Photo: Piet CleijBrian C. Sexton es un pionero in le historia del linguas international.

Ille es le secretario del British Interlingua Society e ex-redactor del magazin Lingua e Vita. Ille nasceva in 1927 in Birmingham, Grande Britannia, ma pro escappar le periculos del guerra ille in 1940 esseva evacuate con su matre e duo sorores a Barmouth in Galles. Su prime incontro con le idea de un lingua international esseva in 1943 ab le libro "Interglossa" per Lancelot Hogben.

Post le guerra Brian C. Sexton (C. pro Carver) retornava a Birmingham pro studiar al universitate, ab le qual ille ganiava un licentiato in historia. In Birmingham ille anque incontrava professor Hogben e professor Ross, professor de linguistica, qui le informava del existentia de interlingua e le dava documentos super illo. In 1951 Sexton anque comprava le libro de Henry Jacobs, "A planned auxiliary language" que presentava e commentava varie linguas, i.a. interlingua. A prime instantia, le latino sine flexione del mathematico italian Giuseppe Peano le placeva le plus, usque ille discoperiva que illo habeva perite in 1939. Esperanto esseva dismodate, Occidental poco euphonic, dunque Brian C. Sexton seligeva ido e deveniva finalmente le redactor de su magazin international "Progreso", ben que ille esseva ancora attrahite per le idea de un lingua plus natural.

In 1959 ille deveniva adherente de interlingua e in 1960 secretario del British Interlingua Society e redactor del magazin "Littera Circular", que deveniva in le estate 1965 Lingua e Vita secundo le idea de Brian Sexton mesme. In 1964 ille habeva le grande placer de incontrar dr. Alexander Gode, quando iste visitava London. Le prime conferentia international del Union Mundial pro Interlingua al qual Sexton assisteva, esseva in Basel in 1971, e desde alora ille ha essite un participante fidel in omne conferentias usque e inclusive illo in Praga in 1995. Pois su sanitate non le permitteva viagiar.

De facto, Brian C. Sexton es le "culpabile" que le conferentias esseva revivificate. Su arrangiamento del 6-te conferentia (o "Sexton conferentia", como illo esseva appellate) in 1983 in Sheffield, ubi ille habita desde que ille veniva de Birmingham in 1965, deveniva le initio del nove era de conferentias biennal.

De profession Brian C. Sexton es bibliothecario e in plus membro al plus alte nivello del "Library Association". Ille esseva pensionate in 1988 ma ha desde alora scribite plure libros e participate in le redaction del importante dictionarios anglese de interlingua. Lexicographia es un facultate cognite de Brian C. Sexton; ja in su periodo con ido ille elaborava dictionarios e ha assi un experientia que interlingua ha utilisate. Ille es le autor de un enorme serie de dictionarios, vocabularios e altere publicationes linguistic in interlingua.

Su altere interesses es computatores, photographia e transportation public urban. Ille assi es membro del Association del Transportation per Ferrovias Legier e sape multissimo de iste thema.

Revidite: 2006-12-29