Louise Delnoy-Sijstermans

Nederland
Nascite: 31 de maio 1931

Le administration del Union Mundial pro Interlingua (UMI) cambiava domicilio - e sexo -, quando le nederlandese Louise Delnoy-Sijstermans in 1994 sequeva Bent Andersen, Danmark, como nove administratrice e tresorera.

Bent Andersen se retirava del posto, que ille habeva assumite desde le reorganisation del UMI in 1970. Louise Delnoy, alora quasi 63 annos, ha essite membro del consilio directive del Societate Interlingua-Nederland desde 1989. Illa habeva ja alora participate al Conferentias International de Interlingua in Heino/Zwolle (1989), Helsingborg (1991) e Borne (1993).

Louise Delnoy ha durante septe annos inseniate confection de vestimentos e designo de modas in un schola pro pueras de 12-16 annos. In 1957 illa se maritava con Jan Delnoy, con qui illa ha quatro infantes - un filio e tres filias. Le copula celebrava lor 40-esime anniversario de maritage le 31 de julio 1997 durante le conferentia international in Strasbourg, Francia.

In 1989 le familia se establiva in le parve urbe Raalte a curte distantia del rural centro conferential "Den Alerdinck", ubi esseva le 10-me Conferentia International de Interlingua in 1989. Isto esseva lor prime participation in un conferentia de interlingua.

Ultra interlingua Louise Delnoy habeva alora ja durante 12 annos essite active in le movimento international de feminas pro le pace e pro equalitate. Illa es membro del consilio directive del section nederlandese e participa in differente gruppos social, pedagogic e emancipatori in le region, ubi illa habita. Illa anque trova tempore pro cultivar flores e cucurbitas in le jardin.

"Le function de tresorera-administratrice del UMI es un defia pro me. Con placer io es preste a assumer le posto," diceva Louise Delnoy-Sijstermans al appunctamento.

Le copula ha desde multe annos essite le tresoreros (in plural) al conferentias international de interlingua, guardante le cassa - e le economia, que sub lor auspicios sempre esseva punctual e in ordine. Illes assi ha essite un parte essential in le preparationes del conferentias e durante illos.

In 1995, illa recipeva un distinction regal. Illa esseva facite Cavallero del Ordine de Oranje Nassau pro su grande labor como "ambassator pro pace e equalitate" in numerose organisationes local, regional e mundial. Le ordine esseva donate per le burgomaestro de Raalte in le casa municipal.

In decembre 2000 moriva le sposo de Louise Delnoy-Sijstermans, Jan Delnoy, de un cancere maligne e incurabile. Illo le toccava subito, poc menses post que illes ambes prendeva parte active - como sempre - in le 7-me Incontro Nordic de Interlingua in Åsa, al sud de Göteborg in Svedia, durante le estate 2000.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua