Historia de interlingua

Biographias A-Z

Bent Andersen

Danmark
Nascite: 17 de martio 1930

Bent Andersen, Borne, julio 1993. Photo: Piet CleijCon poc exceptiones, nulle persona ha habite un influentia si grande al developpamento qualificate de interlingua como le ex-administrator del Union Mundial pro Interlingua, Bent Andersen, Danmark.

Sin le labor energic – multissime horas cata die durante decennios – interlingua non haberea essite tanto expandite como es le caso hodie. Bent Andersen se educava a professor scholar con germano e anglese e examine additional de francese e deveniva pois audiologopedo. In 1951 ille incontrava per su collega professor H.P. Frodelund interlingua e comenciava interessar se pro illo. Con altere pioneros danese, Bent Andersen laborava con e pro interlingua e fundava per su circular in novembre 1959 le base al magazin nordic "Actualitates de Interlingua", cuje editor ille esseva usque 1962.

Al fundation del Union Danese pro Interlingua (DIU) in novembre 1960 ille deveniva secretario e tresorero. Nove secretario deveniva in 1963 Jørgen Kofod-Jensen, ma Bent Andersen remaneva le tresorero fidel usque ille esseva appunctate vice-presidente del DIU in 1994, un posto que ille continua haber.

Desde le establimento del UMI, ille esseva un del duo representantes danese e esseva inter le initiatores del reorganisation del UMI in 1970. Durante omne annos ille participava in le redaction del magazin official del UMI, Currero, como corrector multo competente del linguage. Quando Currero fusionava con le private Heraldo de Interlingua in Panorama in januario 1988, le ancian sonio de Bent Andersen deveniva realitate: esser le typographo del magazin. In su juventute ille hesitava inter devenir typographo o professor scholar – e seligeva le ultime. Ora con Panorama su grande talentos de novo se monstrava. Hodie ille continua le typographisation de Actualitates e – felicemente – le leger probas de cata edition de Panorama.

Su competentia lingual de interlingua es enorme, e su avisos es un tresor pro omnes qui collabora con ille. Ille assi revideva le grande dictionario interlingua-danese per le suprasignate autor in 1989, como ille ha revidite le majoritate del libros apparite in interlingua.

Poco ante le morte de su sposa desde le 8 de julio 1951, Signe (nascite Mikaelsen), le 3 de julio 1997 Bent Andersen decideva diminuer su activitates official pro interlingua. Ille hodie viagia multo e se ingagia in le vita in Odense, ubi ille habita. Ille totevia continua dar bon manos a interlingua como typographo e corrector – como le "senior anonyme de qualitate" detra i.a. iste lineas.

Revidite: 2011-12-22