Skip navigation.
Home

Nove film del incontro nordic de interlingua

Film documentari narra durante 14 minutas del multissime faciettas del 12nde incontro nordic de interlingua in Svedia in julio.

UMINulle calma in Kalmar  Le prime film documentari del traditional e successose incontros nordic de interlingua ha apparite - in interlingua e con subtitulos in interlingua.

Durante le 12nde incontro nordic de interlingua in Kalmar al costa sudest de Svedia in le fin de julio, un equipa active laborava pro poter presentar le multe faciettas de participar. Le resultato es le film con le titulo humoristic "Nulle calma in Kalmar". Illo dura quasi 14 minutas e monstra le incontro, le personas e le vita de interlingua durante le cinque dies. Assi omnes, qui non ha assistite in un conferentia international de interlingua, pote experientiar le ricchessa de activitates que es le resultato, quando on parla interlingua de matino a nocte cata die in un bon compania international.

Participantes ab novem paises
Le 12nde incontro nordic de interlingua attraheva participantes de novem paises al centro Högalids Folkhögskola in le urbe historic, Kalmar, ubi on i.a. faceva un grande demonstration official pro interlingua.

Lars Rosenmeier e Kathrine Breinstrup, Danmark, registrava un serie de interviews con le participantes. Isto es combinate con registrationes de sessiones, excursiones, intertenimento, demonstration e multo plus, e assi es narrate le historia del incontro nordic. Thomas Breinstrup ha participate in le redaction final e narra inter le episodios. Tote le film ha subtitulos in interlingua, assi que illo simultaneemente pote esser usate in le inseniamento de interlingua in tote le mundo.

Le intention con le film es non solmente documentar le incontros nordic. Le arrangiatores spera que illo va attraher multe nove participantes pro le proxime incontro que essera in 2012.

Omne duo annos desde 1988
Nulle calma in KalmarLe incontros nordic de interlingua ha essite arrangiate como assembleas estive omne duo annos in annos par desde 1988, sempre in le fin de julio. Primo es arrangiate cursos intensive de interlingua de mercuridi a venerdi. Venerdi postmeridie attende 44 horas de discussiones e excambios de experientias e ideas in un atmosphera commode e international. Malgrado le tempore limitate, il ha spatio pro labor in gruppos, plure discursos e presentationes minor (in ma non super interlingua), intertenimento e excursiones touristic in le vicinitate. Anque multe non-nordicos participa. Le vices recente il ha habite visitatores de Japon.

Le ambassador lingual de UNESCO, le ex-presidente islandese Vigdís Finnbogadóttir, ha essite protector del incontros que es arrangiate per le quatro organisationes nordic de interlingua in Svedia, Norvegia, Danmark e Finlandia.

Lege plus:
Incontro nordic face le motor rolar (2010-08-16)
Reporto del incontro nordic in radio (2010-08-16)
Salute del Incontro Nordic de Interlingua (2010-07-31)
Tres dies con cursos intensive de interlingua (2010-03-22)
12nde incontro nordic de interlingua in urbe historic (2009-11-07)

Initio del pagina