Skip navigation.
Home

Reporto del incontro nordic in radio

|

30 minutas con novas e amusante episodios del 12nde incontro nordic de interlingua in Radio Interlingua.

UMI  Un ample reporto del 12nde incontro nordic de interlingua in Kalmar in le sud de Svedia in le fin de julio plena le emission jubilari de Radio Interlingua.

In le 25nte emission del radio que on pote ascoltar directemente per Internet o discargar como files MP3, le secretario general del Union Mundial pro Interlingua (UMI), Sven Frank, e le secretario del Union Danese pro Interlingua (DIU), Thomas Breinstrup, narra super le resultatos e eventos durante un medie hora, plen de musica.

Cursos intensive e excambio de experientias

Le incontro esseva arrangiate per le quatro organisationes nordic de interlingua in Svedia, Danmark, Norvegia e Finlandia ma attraheva participantes de in toto novem nationes. Le incontro comenciava le 28 de julio con duo cursos intensive de interlingua - uno pro comenciantes, un altere pro illes qui voleva practicar conversation. Le 30 de julio le cursos finiva, e 44 horas de incontro comenciava, durante le qual le participantes excambiava ideas e experientias de como diffunder interlingua e le uso de illo ancora plus in tote le mundo ma naturalmente specialmente in le cinque paises nordic que anque comprehende Islanda.

Le reporto in Radio Interlingua narra del cursos, del demonstration a transverso del urbe Kalmar, del decisiones, del ample mention in le pressa e del discursos e intertenimento. Isto occurre como un conversation inter Sven Frank e Thomas Breinstrup in le studio.

Radio Interlingua publica cata mense un nove emission totalmente in interlingua sub le redactorato de Péter Kovács, Hungaria, qui in augusto 2008 assumeva le carga. Le emissiones ha devenite multo popular. Milles de personas los discarga o ascolta directemente in www.interlingua.com/radio.

Initio del pagina