Skip navigation.
Home

12nde incontro nordic de interlingua in urbe historic

Le quatro organisationes nordic de interlingua invia omnes a Kalmar le 28 de julio al 1 de augusto 2010 pro cursos intensive e incontro nordic - que in general deveni multi-national.

NOVE: le scheda de inscription
(in formato PDF)
Inscribe vos hodie!

UMIKalmar - centro pro le 12nde incontro nordic de interlingua 2010  Reserva le ultime septimana de julio 2010 pro cursos intensive de interlingua e le 12nde incontro nordic de interlingua in le historic urbe sud-svedese Kalmar in le provincia de Astrid Lindgren.

Le quatro organisationes nordic de interlingua in Svedia, Norvegia, Danmark e Finlandia invia omnes a Kalmar le 28 de julio al 1 de augusto 2010 pro cursos intensive de interlingua a duo nivellos e un mini-conferentia nordic de interlingua, que in general deveni multi-national, proque anque non-nordicos desira participar. Le passate incontros ha habite visitatores de mesmo Japon.

Le incontro habera loco a Högalids Folkhögskola, a 7 km del centro de Kalmar, facilemente accessibile al autostrata E22. Il ha connexiones excellente per trainos directe ab Copenhagen (Danmark), Malmö, Göteborg e Stockholm, e Kalmar ha un aeroporto a 10 minutas de vehicular del vetere centro.

Le cursos - uno pro comenciantes, un altere pro personas qui desira practicar conversation - comenciara in le antemeridie de mercuridi le 28 de julio e durara usque le caffe postmeridial in venerdi le 30 de julio. Con le dinar a 17 horas comenciara le incontro nordic que continuara usque al fin del lunch dominica.

Le costo pro cameras singule con omne repastos includite essera al maximo 2.500 coronas svedese, ma le precios final essera communicate si tosto como possibile.

Le Castello de KalmarDurante le sojorno il habera excursiones touristic - le famose castello de Kalmar (photo) e un rapide visita al insula de Öland via le famose ponte es sub planification, ma anque super isto informationes precise va esser communicate, quando toto se ha arrangiate.

Kalmar es situate in le provincia Småland, le region de Astrid Lindgren, le famose scriptor svedese cognoscite in tote le mundo. Le Castello de Kalmar esseva le centro, quando Danmark, Svedia e Norvegia se univa sub le regina danese Margrete I in 1397. Le castello remane intacte hodie.

Le Societate Svedese pro Interlingua es le organisator principal del 12nde incontro nordic de interlingua con cursos e essera multo interessate in saper, qui ha le intention participar. Personas, qui ja ora sape que illes expecta participar, es pro isto benvenite a inviar un message al secretariato del SSI (clicca ci)

"Reserva jam ora in vostre calendarios le ultime septimana de julio pro iste incontro, e apporta cata uno al minus un novicio pro le curso intensive," dice Ingvar Stenström, secretario del SSI.

Inscribe vos hodie: le scheda de inscription (in formato PDF)

Initio del pagina