Historia de interlingua

Ellipse colorate

Un visita ab le nubes

Alexander Gode, le ultime chef del labor lexicographic del International Auxiliary Language Association, visitava Danmark le 22 de decembre 1963. Iste visita naturalmente esseva de grande valor pro le enthusiasmo del interlinguistas danese. Le visita prendeva loco in le casa de Lith e Hans Neerbek, co-fundator e prime vice-presidente del Union Danese pro Interlingua tres annos plus tosto.

Memorias

Hans Neerbek, initiator al Union Danese pro Interlingua e su prime vice-presidente ha in augusto 1996 con humor scribite su memorias del episodio, post que ille habeva le occasion a discuter lo con Ingvar Stenström durante le 5-nte Incontro Scandinave de Interlingua in Växjö, Svedia, le 2-4 de augusto 1996.

Per Hans Neerbek

Il es duo dies ante le vespere de Natal in le anno 1963. Super toto in parve Danmark il ha grande occupation con le preparationes de Natal, ma presso le familia Neerbek le casa sta sur palos calente, nam le message ha arrivate que le "pontifice" del interlinguistas, dr. Alexander Gode, va arrivar a visita ab le Statos Unite.

Le parve grege brave de membros domestic ha essite invitate e ha arrivate. Bjarner e Ellen Svejgård ab Stavnsholt, Jørgen Kofod-Jensen con familia ab Farum, Jan Casse ab Virum, si, mesmo Frodelund 1 e Bent Andersen ha riscate ir le longe via ab Fionia. Ma ora non venira plus, nam le duo ha solmente con penuria passate le Grande Belt. Le tempesta de nive forte transversa le pais, e a un loco la in le nubes dr. Gode es al via. Le filio le plus grande del familia, Klavs, ha ite con le auto pro prender le visitator in le aeroporto ma retorna con carrossa vacue. Le machina non ha potite atterrar. Le atmosphera es al puncto de zero in le parve casa. Le duo filios le plus juvene, Povl e Hasse, ha sedite cantante le canto super le parve gnomo, qui viagiava con "extraposta" al pais del mogul grande pro trovar le homine le plus grande 2. Ora illes spera vider le totevia.

Finalmente, le aeroporto communica que on pote atterrar, e Klavs va al aeroporto de Kastrup de novo.

E alora le "mogul grande" sta in le porta; un alte personage tenue, e sub le capillos blanc un surriso humoristic scintilla detra le vitro del berillos.

Le pueros le presenta pro lor feritate, "Extraposta", le prime magazin professionalmente imprimite in Danmark, si, forsan in tote le mundo, e le altere presentes tene le visitator honorari al currente con le developpamento in altere partes de Scandinavia. "Bladin, Nordin - din din 3," ille dice con meravilia in le voce basse. Forsan omne nomines svedese fini in le mesme maniera?

Ille es tentate a leger in alte voce de su libro "Interlingua a prime vista" 4 super le multe cravatas de senior Smith con differente colores. Un Beocord (registrator, red.) debe registrar le r's rolante, distante del pronunciation domestic (danese, red.).

Su sposa multo juvene, Alison Gode-von-Aesch, non dice multo, e le baby inveloppate ancora minus. E ora, quando on ha conversate e mangiate de conversate de novo, omnes es un poco exhauste post un longe die.

Ante que on se separa, on scribe in le album de visitantes. "In iste casa nos ha potite sentir: Nos es in nostre casa. Gratias, amicos," dice le salute del doctor.

Alora le tour va a Copenhagen in le auto del familia. In alto in le parve camera de hotel al tertie etage dr. Gode prende adeo con su hospites. Le lumine ab le camera jecta un luce peculiar super le homine fatigate un poco incurvate con le surriso amical.

Alexander Gode ha essite in Danmark - pro le prime e ultime vice.

Invitation al incontro con Alexander Gode (in danese)
Ecce le invitation (in danese) al incontro con Alexander Gode e su sposa durante lor visita a Danmark in 1963, inviate al membros del Union Danese pro Interlingua per le administrator del DIU, Bent Andersen. Clicca sur le imagine pro vider lo in formato plus grande.

----------

Notas

1 H.P. Frodelund (1912-1996)

2 "Extra Posta" esseva facite pro e per le alumnos al Østersøgades Gymnasium in Copenhagen con Povl Neerbek como redactor e un contento de parolas cruciate, parve cantos, le rubrica "Viagia con senior Hansen" e parve annuncios. Illo esseva le prime magazin professionalmente imprimite in interlingua. Appareva ab 1962 (quatro editiones) usque 1965 (duo editiones).

3 Fil. dr. Wilhelm Bladin collaborava con ing. John Nordin (1887-1983) e fil. mag. Erik Berggren (1907-1992) al grande "Svensk-interlingua ordbok", editate in 1965.

4 "Interlingua a prime vista", 1-me edition 1951, 2-nde edition 1971.

Revidite: 2012-10-14