Historia de interlingua
Biographias A-Z

Gunnar Ljusterdal

Svedia
Nascite: le 1 de martio 1931

Gunnar Ljusterdal, redactor de Grönköpings VeckobladLe moustache es characteristic, su capello anque. E su charme e sapientia non lassa ulle dubita. Ci sta le recognoscite redactor in chef – ora partialmente pensionate – del septimanal le plus curiose in le mundo, Grönköpings Veckoblad. Illo describe le vita de un societate non existente ... e appare cata mense.

Gunnar Ljusterdal es le nomine, redactor in chef durante plus que 20 annos e ancora scriptor del editorial del influential magazin satiric svedese.

Gunnar Ljusterdal nasceva in 1931 in Värmland, e post studios in Uppsala ille laborava como jornalista a Dagens Nyheter, Västmanlands Läns Tidning e UNT. In 1952 ille esseva stenographo del parlamento svedese, Riksdagen, e assi parte del tote branca de sex personas, qui omnes es membros del Societate Svedese pro Interlingua. Como stenographo, ille laborava 37 annos – usque 1989 – in le parlamento e assi sedeva usque a cinque horas del matino pro notar tote lo que esseva dicite.

In le parlamento, ille anque developpava le redactor in se pro Grönköpings Veckoblad. Ille esseva scriptor al jornal desde 1971, e in 1977 ille deveniva su redactor in chef. Durante annos - usque 1999 - ille piccava le vita politic svedese per su satira, e le septimanal mensual anque de tempore in tempore publicava poemas in le "lingua" transpiranto, un satira al incomprensibile lingua de un nomine similar. Le redactor diceva con humor: "Le pejor es que il ha rarmente novas de Grönköping. Le melior es que altere novas sovente resimila a illos de Grönköping."

Gunnar Ljusterdal cambiava domicilio ab Uppsala a Särdal, al nord de Halmstad (in le region Halland) post su pensionamento del stenographia in 1989. Ci ille habita con su amabile sposa Britta, qui es artista de textiles. Le duo participava i.a. al 12-nde Conferentia International de Interlingua in Praga in 1995. Ille anque ha date visitas a plure incontros nordic de interlingua.

E alora ille ha cinque dies per septimana scribite un verso satiric pro Västmanlands Läns Tidning ... desde 1961!

Gunnar Ljusterdal recipeva in 1982 le Grande premio jornalista e in 1983 le stipendio cultural del parlamento regional de Uppsala. Ille ha essite appunctate membro honorari del Societate Svedese pro Interlingua.

Revidite: 2006-12-29