Olu-Birgit Jeppson

Svedia
Nascite: le 13 de junio 1908
Morite: le 25 de decembre 2002

Quando Jesper Olsson, le ex-presidente del Union Mundial proInterlingua, como vice-presidente del corporation del studentes humanistic in 1997 debeva facer su prime deber official: congratular le plus vetere studente del Universitate de Lund, ille se trovava, a su surprisa, ante le interlinguista Olu-Birgit Jeppson, alora celebrante su 90 annos.

Le membro le probabilemente plus vetere del Societate Svedese pro Interlingua moriva al die de natal, le 25 de decembre 2002, in le etate de 95 annos.

In 1930 Olu Birgit Jeppson comenciava laborar como secretaria in le famose ompania Tetrapak in Stockholm e introduceva ibi le "revision interne". Novem annos plus tarde illa retornava, con le firma, al provincia de su nascentia, Skåne, e laborava ibi usque a su pensionamento in 1967. Ma non pro gauder del otio. Illa comenciava in vice studiar al universitate: primo musicologia, postea le greco moderne e le hebreo. Al etate de 74, illa ganiava su grado de fil. kand. e continuava studiar.

"Musicotherapia deveniva a illa un car specialitate, que illa considerava subestimate in le cura de stress etc. Io non sape lo que la attraheva a interlingua. Forsan le belle sono musical de nostre lingua o le facilitate contrastante tanto al linguas difficilissime que illa habeva studiate. Sovente illa telephonava pro informar nos de mentiones de interlingua in le pressa, o de articulos de materias linguistic, e esseva dunque in despecto de su 95 annos un membro active," dice le secretario del Societate Svedese pro Interlingua, Ingvar Stenström.

Olu Birgit Jeppson anque establiva contactos con bibliothecas super compra de libros e remaneva sempre positive. Illa nasceva le 13 de junio 1908.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua