Historia de interlingua
Biographias A-Z

Deanna Lindberg Hammond

Statos Unite de America
Nascite: (non cognite)-11 de octobre 1997

Deanna L. Hammond, presidente del Interlingua Institute desde decembre 1993, moriva le 11 de octobre per cancere pancreatic in su casa in Alexandria, Virginia. Illa habeva solmente 55 annos.

Deanna L. Hammond esseva traductor e recercator official. Illa esseva specialista de traduction espaniol e esseva capite del section pro servicios linguistic al Servicio Congressional de Recercas del Bibliotheca del Congresso, que provide traductiones ab linguas estranier pro le congresso american. Illa inseniava traduction espaniol al Universitate George Mason pro quatro annos e antea, in le prime 1990s, al Universitate American.

In 1994 illa resignava ab le Association de Traductores American (ATA), ubi illa esseva presidente 1989-1991 e recipeva in 1992 le premio le plus alte, le Medalio Alexander Gode, establite in honor del fundator de ATA, qui esseva anque le ultime chef del labores ante le publication de interlingua in 1951. Illa esseva le chef del delegation american al Congresso Statutori del Federation International de Traductiones in augusto 1990 in Beograd, Yugoslavia.

Le patre de Deanna L. Hammond esseva canadian, su matre american. Illa graduava del Universitate Washington State, recipeva un grado maestro in linguistica ab le Universitate de Ohio e un doctorato in linguistica espaniol ab le Universitate Georgetown. In 1964-1967 illa habitava in Colombia, primo como voluntario de un corpore de pace, pois como inseniator de anglese al Universidad Industrial de Santander. Illa inseniava in le schola superior in Pullman, Washington, ante de venir a Washington, District of Columbia, in 1974. Illa laborava como voluntario pro le senator Henry M. Jackson, e 1974-1977 illa anque inseniava anglese como secunde lingua al Northern Virginia Community College.

Deanna L. Hammond organisava conferentias pro le Association pro Traduction per Machina in le Americas. Illa esseva active in Zonta International e esseva membro del societates Phi Beta Kappa e Phi Beta Phi honorari. Illa viagiava in Europa e le Americas. Illa anque scribeva plure articulos in magazines como Congressional Record, The Modern Language Journal, Political Science Annals e American Translators Association Chronicle.

Deanna L. Hammond lassava post se su sposo, Bill Fry, tres filiastras, su matre e un fratre.

Le vice-presidente del Interlingua Institute, Leland B. Yeager, la succedeva temporarimente como presidente del Interlingua Institute usque al reappunctamento de Henry Fischbach in le fin de januario 1998.