Historia de interlingua
Biographias A-Z

Knud Fogt

Danmark
Nascite: le 31 de martio 1922
Morite: le 13 de junio 1988

Communication international esseva un thema que marcava le vita de Knud Fogt, consiliero del Union Danese pro Interlingua. Su enorme interesse pro intercomprension nordic le duceva finalmente a interlingua e le intercomprension international.

In 1943, Knud Fogt prendeva le examine como professor. De 1946 a 1956 ille esseva empleate al schola danese in Tolk a Silesia, de 1947 insimul con su sposa Hilkka de Finlandia. Illes habeva duo infantes, Anne e Jens Frode.

In iste periodo post le Secunde Guerra Mundial, le idea de un commun lingua scripte nordic comenciava prender forma. De 1956 Knud Fogt cambiava domicilio a Egense al est de Aalborg in Jutlandia de nord, e ille deveniva professor al schola. Ci ille establiva su proprie casa editorial, Internord, ubi ille editava plure libros. Un de illos esseva "Drenge i krig" (Pueros in guerra) per Leo Novrup, 1966. Ille obteneva le permission de rediger le linguage, assi que illo deveniva facile a leger pro norvegianos e svedeses.

Hilkka e Knud Fogt deveniva le copula gerente de Try Højskole (le Schola Popular de Try). Durante iste periodo ille non habeva tempore pro su internordico, ma le labores esseva recomenciate, quando ille esseva pensionate, e le copula cambiava domicilio retro a Egense. Alora le magazin Internord comenciava apparer in maio 1987. Octo editiones ille succedeva facer. Numero 9, que narra del morte de Knud Fogt, esseva finite per su filio Jens Frode Fogt. A su morte in le etate de 66 annos, Knud Fogt laborava con un dictionario internordic que anque debeva continer un grammatica.

Knud Fogt esseva sempre positive e habeva multe ideas. Ille lo demonstrava vice post vice como consiliero del Union Danese pro Interlingua que gaudeva de su grande ingagiamento durante multe annos. Ille deveniva consiliero in septembre 1985 post haber essite membro ordinari durante decennios.

In februario 1987 usque a su morte, Knud Fogt esseva co-redactor danese del magazin scandinave Actualitates.

Durante un serie de annos Knud Fogt esseva le presidente del Vendelbomålforeningen (le Association del Dialecto Vendelbo, in le nord de Jutlandia, red.), e ille editava plure publicationes in le dialecto que ille maestrava si charmantemente. Ille anque esseva active in le Grænseforeningen (Association del Frontiera). Su enorme sapientia e impressionante facultate de narrar le faceva le optime guida de plure excursiones al sud de Danmark con Grænseforeningen.

Su ingagiamento sempre active faceva Knud Fogt un grande personalitate cultural in Jutlandia del nord. Ille esseva un agradabile homine con un calide corde, cuje natura aperte e sempre bon humor le dava multe amicitias in Danmark e in le estraniero, ubi su labor intelligente e real esseva altemente respectate.