Historia de interlingua
Biographias A-Z

Frederick Gardner Cottrell

Statos Unite de America
Nascite: le 10 de januario 1877
Morite: le 16 de novembre 1948

Frederick Gardner CottrellFrederick Gardner Cottrell esseva un scientista renominate, qui laborava infatigabilemente a provider le mundo scientific de un lingua commun. Esseva ille qui primo faceva Alice V. Morris e Dave Hennen Morris de New York prestar attention al problema e pois laborava con illes pro fundar le "International Auxiliary Language Association" (IALA), que in 1951 publicava le prime obra de interlingua.

Frederick Gardner Cottrell esseva un director de IALA ab 1924, quando le organisation esseva legalmente constituite, usque a su morte in 1948. Ille esseva un figura familiar e amate al quartiero general de IALA que ille non negligeva jammais visitar, quando ille passava per New York in su viages al quatro angulos del mundo ubi su consilios de scientista esseva desirate.

Le attitude de Cottrell esseva characterisate per objectivitate e absentia de sentimentalitate verso le societate human. Le idea animante de su existentia de septanta-duo annos esseva que le frontieras dividente le scientias in campos special debe esser perciate a fin que un constante excambio de cognoscentias scientific pote facer se inter illos in le interesse de lor application fructuose al ben social. Ille sempre pensava non solmente como scientista ma anque como economista e psychologo con large sympathias e un comprension compatiente pro le natura human.

Iste attitude conduceva directemente a su preoccupation perpetue con relationes international in le campo del scientias pur e applicate, e specialmente in su proprie campo de chimia.

Su conviction que un lingua international como un del instrumentos pro coordinar le recercas de scientistas de differente paises es possibile, deriva de su experientia de prime mano a conferentias international in Europa. Longemente ante que ille incontrava senior e seniora Morris e les inspirava le mesme conviction, ille habeva interprendite solitarimente e persistentemente colliger fundos pro le typo de studio scientific del problema linguistic que al fin ille videva realisate in le programma de IALA.

Post le Prime Guerra Mundial doctor Cottrell contribueva a poner de novo in contacto le gruppos national de scientistas que le annos del conflicto habeva separate. Al Assemblea General del Consilio International de Recercas, que ille habeva adjutate a organisar, ille introduceva un resolution (scribastrate per ille al reverso de un usate copertura de littera) de appunctar un comité pro "investigar e relatar le stato presente e le prospecto possibile del problema general de un lingua auxiliar international." Le comité esseva establite, e ille esseva facite su presidente. Isto esseva le prime capitulo del historia de IALA.

Un altere institution que incarna le spirito de Frederick Gardner Cottrell es le Corporation del Recercas (Research Corporation in Tucson, Arizona). Con le altruismo typic de iste samaritano de scientia, Cottrell cedeva a un gruppo de homines de affaires omne le derectos a su patentes pro un processo de precipitation electric con le stipulation que le profitos deberea esser re-empleate pro recercas de valor social. Per iste acto ille sacrificava un fortuna potential. Multe projectos importante ha recipite subventiones de iste organisation unic, que ha usque ora contribuite con 150 milliones de dollars. Illo ha financiate le prime experimentos de disintegration del atomo. Isto esseva facite al requesta de Frederick Gardner Cottrell, qui esseva enthusiasta pro le labor a cyclotron de doctor E.O. Lawrence del universitate de California. Le uso industrial del energia atomic e le uso medicinal del radiation atomic esseva naturalmente applicationes promittente que Cottrell comprendeva immediatemente. Le uso del energia atomic per le fortias demoniac del guerra debeva parer a iste humanitario como un ironia profunde. Recercas importante in le campo de vitaminas e cortisone ha essite financiate per le moneta que Cottrell haberea potite amassar pro se mesme.

Le subventiones generose donate per le Corporation del Recercas al labores de IALA correspondeva al plano de Cottrell de interligar projectos de recerca in diverse campos proque ille comprendeva le significantia de tal approximationes pro le progresso del scientia.

Doctor Cottrell nasceva in Oakland, California. Ille esseva graduate al collegio de universitate de California in 1896 e continuava su studios al universitates de Berlin (1901) e Leipzig, ubi ille obteneva le doctorato in 1902. Ille deveniva le director del Bureau de Minas e postea del Division de Nitrogeno Fixate del governamento american. Multe positiones academic esseva offerite a Cottrell, ma ille prefereva remaner libere pro poter viagiar in su pais e al extero e stimular contactos inter scientistas. Multe honores esseva conferite super Cottrell, ma ille habeva rarmente le tempore pro le ceremonias de acceptar los. In su proprie labores original in le campo de chimia ille se occupava de nitratos, petroleo e helium. Su nomine supervive in le "processo Cottrell" e le "Precipitator Cottrell" developpate per ille pro le precipitation de particulas solide de fumos urban e industrial. Ille participava activemente in le developpamento del enorme interprisa hydroelectric in le vallata del Tennessee, ora universalmente cognoscite como TVA (Tennessee Valley Authority).

Frederick Gardner Cottrell non viveva assatis longemente pro vider le publication del dictionario interlingua-anglese editate per IALA in 1951. Multe vices ille habeva dicite que un lingua international certo venirea e, como ille soleva facer, ille haberea ascribite tote le merito a alteres.

Le biographia es partialmente basate sur un articulo per Mary Bray in "Novas de IALA", vol. 1, no. 7, april 1952.

Revidite: 2006-12-29