Forrest Fenton Cleveland

Statos Unite de America
Nascite: (non cognite). Morite: le 8 de februario 1985

Le labor pro interlingua de Forrest F. Cleveland (photo a dextere de The American Engineer, 1960) es un eminente exemplo de como un specialista succede facer qualcosa totalmente unic. Su publication del magazin "Spectroscopia Molecular" integremente in interlingua dava a su collegas in tote le mundo informationes que illes non poteva obtener in altere maniera.

Forrest F. Cleveland esseva professor de physica e director del recerca spectroscopic in le Instituto Illinois de Technologia in Chicago. Ille esseva un del autoritates superior de interlingua in le SUA, editante e publicante su jornal international.

Ille nasceva in Kentucky e obteneva le grado "Bachelor of Arts" (A.B.) del Transylvania College in 1927. Ille recipeva le grado Maestro de Scientia del Universitate de Kentucky in 1930 e le Ph.d. in physica in 1934. Ille plus tarde serviva como professor e capite del departimento de physica al Lynchburg College e como professor assistente del Institute Armour de Technologia. Ille veniva al Instituto Illinois de Technologia in 1940 como professor associate. In 1943 ille esseva promovite a professor de physica e director de recercas spectroscopic. Ille remaneva al instituto usque a 1971, quando ille deveniva professor adjuncte de ingenieria electric al Universitate de Kentucky in Lexington.

Forrest F. Cleveland esseva un membro del Association of Physics Teachers, del American Association of University Professors, Virginia Academy of Science, Sigma Xi, e Sigma Pi Sigma. Ille esseva anque editor associate del Journal of Chemistry and Physics de 1950 a 1953.

De maio 1952 e 29 annos in plus, a 1980, ille publicava su "Spectroscopia Molecular", un magazin pro specialistas. In le magazin Science (vol. 126, numero 3263, del 12 de julio de 1957, pagina 64), Forrest F. Cleveland scribe sub le rubrica "Communication in le Scientia":

"Un Experimento del Autor
Le autor es ingagiate in un experimento in publication in un tal lingua. Depost maio 1952, ille ha redigite e publicate in su mesme campo de recerca un parve periodico mensual, appellate Spectroscopia Molecular, in le nove lingua international, interlingua. Iste periodico es nunc inviate a 800 spectroscopistas e bibliothecas in 37 paises. Experientia demonstra que le recipientes pote leger illo sin difficultate a que illes senti que le periodico es un servicio de valor in iste campo al nivello international.

Le objectivo es distribuer novas e informationes (includente annunciationes de companias) de interesse e valor al spectroscopistas molecular e supportar le periodico completemente per contributiones financiari ab le spectroscopistas, bibliothecas, e companias que beneficia de su existencia. Le receptas del periodico ha essite sufficiente pro pagar le costos e pro accumular un reserva que assecura publication pro un anno in avantia.

Le reception sympathic de iste parve periodico suggere que le tempore poterea esser plus matur que haberea essite expectate pro le publication de resultatos scientific in un lingua international."

In augusto 1977, le direction del american Interlingua Institute in un resolution exprimeva "e gratitude e felicitationes a professor Forrest F. Cleveland qui ha completate vinti-cinque annos de publication mensual ininterrumpite de Spectroscopia Molecular."

Marguerite Ewalt Cleveland, le vidua de Forrest F. Cleveland, moriva le 9 de octobre 1997, 91 annos de etate.

Revidite: 2006-12-29

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua