Historia de interlingua
Biographias A-Z

Piet Cleij

Nederland
Nascite: 27 de maio 1927

Piet Cleij al Conferentia International de Interlingua in Helsingborg, Svedia, in 1991. Photo: Henrik BreinstrupPiet Cleij, secretario general del Union Mundial pro Interlingua inter julio 1991 e augusto 2005 e desde alora vice-secretario, nasceva in Groningen in le parte nord de Nederland. Ci ille frequentava le schola secundari inter 1940 e 1945 durante le Secunde Guerra Mundial studiante germano, anglese e francese, geographia, historia, biologia, physica e chimia, e mathematica.

Primo ille laborava duo annos in un laboratorio de un grande fabrica chimic ma participava alora in un curso fulmine e cambiava profession pro devenir instructor del schola elementari. Post studios specialisate de francese ille terminava su carriera professional per un periodo de 16 annos como professor de francese e del litteratura francese in le lyceo de Baarn.

Su interesse pro linguas auxiliar veniva in 1945, quando ille adhereva al club de esperantistas in Groningen. Le lectura in 1952 del libro "Vijf Kunsttalen" (Cinque linguas artificial) per doctor Manders le aperiva le oculos, e ille quitava omne su labores pro esperanto (e perdeva multe "amicos") e deveniva occidentalista. Ma le Occidental-Union dispareva poco a poco, e in 1989 un littera ab Frits Goudkuil – gerente del Servicio de Libros UMI – le reactivava. Piet Cleij deveniva membro del UMI e collaborava in le fundation del Societate "Interlingua-Nederland" in 1990, ubi ille es ancora vice-presidente e redige le "Voce de Interlingua", como ille lo ha facite desde le initio in le mesme anno.

Ja al conferentia de interlingua in Heino, 1989, Piet Cleij durante un participation de un singule die enthusiasmava le participantes per su energia e su presentation de un traduction in nederlandese del grande dictionario interlingua-anglese ("Interlingua-English Dictionary" de 1951). Iste labor ha continuate; cata die Piet Cleij usa al minus un hora cercante nove parolas, expressiones etc. Le editiones le plus recente del dictionarios interlingua-nederlandese e nederlandese-interlingua comprehende respectivemente quasi 51.000 e 144.000. E cata die nove entratas se adde, gratias al introduction del computator in le casa private sur Kometenlaan 38 in Bilthoven.

Solmente duo annos post su "apparentia", Piet Cleij esseva eligite secretario general del UMI al conferentia de interlingua in Helsingborg, Svedia, in julio 1991. Su appunctation ha addite nove vita al organisation international de interlingua, e ille ha prendite parte in un reforma del structura con un consilio executive e un consilio general. Le UMI ha fortificate su position e ha devenite un organisation international capturante le attention in foros global.

Piet Cleij fundava le Comité Linguistic, cuje organisator in le initio esseva ille (hodie Ferenc Jeszenszky de Hungaria lo preside), e ille establiva le Fundo pro Europa Oriental que supporta le labor pro interlingua in Europa del Est.

Ille succede trovar tempore libere pro su grande passion – photographiar –, lo que le participantes del conferentias de interlingua sape multo ben. Post cata conferentia un serie de dense inveloppes con photos blanc-nigre es expedite ab Bilthoven.

Ille anque ha grande interesse in sport, specialmente in le patination de velocitate. Usque al anno 2000 ille ha functionate durante 32 annos in le direction, i.a. como presidente, de un club de patinatores de velocitate in su region.

In 2005, post un maritage de 53 annos, Piet Cleij ha perdite su sposa.

Piet Cleij ha tres filios e un filia.

Revidite: 2007-10-10