Historia de interlingua

Biographias A-Z

Giovanni Blandino

Italia
Nascite: le 14 de april 1923 - le 26 de februario 2011

Giovanni Blandino
Giovanni Blandino in un interview super su labores con CercoDio TV.

Le associato distinguite del Union Mundial pro Interlingua, le professor italian Giovanni Blandino, esseva philosopho, professor universitari e un diligente scriptor theologic, e ille publicava un grande autorato in interlingua. Pro isto, ille deveniva in 1991 le secunde associato distinguite del UMI, sequente le premiato Nobel american James M. Buchanan. Giovanni Blandino moriva le 26 de februario 2011, 87 annos de etate. Ille nasceva le 14 de april 1923 in Roma.

Giovanni Blandino habitava in su residentia in le curia jesuita in le Vaticano, ubi ille esseva cognoscite como un persona active. Ille obteneva le licentia in philosophia e in theologia al Pontificia UniversitÓ Gregoriana, laureato in scientia biologic del Universitate Statal de Roma, e laureate in theologia del Pontificia UniversitÓ Lateranense. Ille esseva docente de philosophia del cognoscentia e del scientia in le Ponitificia UniversitÓ Lateranense.

Ille ha publicate numerose articulos in revistas italian e estranier e es le autor de un longe serie de publicationes in interlingua e altere linguas, publicate per le universitates. Ille esseva un interlinguista desde multe tempore e trovava placer in le facto que interlingua es si facile a comprender in tote le mundo. Pro isto ille decideva publicar plure obras principal in interlingua.

Ille anque usava interlingua in practica in altere manieras. In 1995, le circa 130 cardinales e le Papa recipeva un scripto private de 16 paginas in interlingua de Blandino – un action que ille repeteva ancora duo vices durante le annos sequente. E le Papa le respondeva personalmente.

Giovanni Blandino esseva un homine con enthusiasmo e energia pro interlingua e pro su passion religiose.

In interlingua ha apparite quasi 1.500 paginas de su mano in iste libros: "Problemas de theologia catholic – un recerca de synthese" (1990), "Le existentia de Deo e le immortalitate del anima" (1990), "Philosophia del Cognoscentia e del Scientia" (1990), "Questiones ulterior de philosophia de Cognoscentia e del Scientia" (1991), "Questiones ulterior de Philosophia del Esser" (1991), "Un discussion sur le Ethica del felicitate" (1991), "Le beltate genial del christianismo" (1993), "Angelos e demonios, spiritismo" (1993).

Revidite:2011-12-22