Quanto ben cognosce tu le historia de interlingua? Ecce 30 questiones. Ha tu 30 responsas?

UMIQuiz de interlingua  Interlingua celebra in 2026 su 75e anniversario. Isto es un excellente occasion pro facer un test de tu cognoscentia al historia del lingua. Ecce le quiz historic de Panorama in interlingua martio-april 2024. Tu trova le responsas correcte in le fundo de iste pagina (ma non reguarda los in avantia!).

Visita le section Historia de interlingua e studia le grande material con factos, portraits, biographias, curiositates etc. Compra le libro “Interlingua e su promotion durante 50 annos” per Ingvar Stenström (ISBN 978-91-971940-5-1)

Quiz del historia de interlingua

1. Quando esseva arrangiate pro le prime vice le Die de Interlingua?
  A. 1976
  B. 1992
  C. 1981

2. Qui esseva Alexander Gode?
  A. famose poeta brasilian, qui scribeva in interlingua
  B. millionario qui supportava le labor de interlingua
  C. le ultime director de recercas de IALA (“International Auxiliary Language Association”), que elaborava interlingua

3. Un equipa danese-svedese traduceva in 1997 cinque famose contos — de qui?
  A. H. C. Andersen
  B. Astrid Lindgren
  C. Sherlock Holmes

4. André Schild (1910-1981) esseva le prime secretario general del Union Mundial pro Interlingua in 1955. De qual nationalitate esseva ille?
  A. germano
  B. austriaco
  C. suisso

5. In augusto 2024 habeva loco ancora un incontro nordic de interlingua. Qual vice es isto que le daneses, svedeses, norvegianos e finneses se incontrara pro planificar actiones commun e excambiar ideas?
  A. le dece-secunde
  B. le dece-octave
  C. le vinti-tertie

6. In decembre 1997 appareva le volumine del Grande Encyclopedia Danese con interlingua. Quanto plena le articulo?
  A. 11 lineas
  B. un medie columna
  C. plus que un columna + un scheda

7. “Ia” es le abbreviation official de interlingua, approbate per le organisation de standardisation international, ISO. Secundo qual standard es isto?
  A. 2000   B. 639   C. 9000

8. Le bibliothecas danese faceva ab 1998 un cambio con signification pro interlingua. Le qual?
  A. interlingua ha gruppos separate pro manuales e litteratura in le systema de classification decimal
  B. on compra un grande stock de libros in interlingua pro le bibliothecas principal
  C. on pote prestar le libros pro 1½ menses in vice de 1 mense

9. Quando aperiva le UMI su www.interlingua.com?
  A. le 15 de januario 2001
  B. le 3 de augusto 1997
  C. le 28 de julio 1995

10. Proque ha le 15 de januario essite seligite como le Die de interlingua?
  A. a ille data on prendeva le decision de un die special pro interlingua
  B. a ille data in 1951 esseva registrate le “Interlingua-English Dictionary” in le officio american de derectos del autor
  C. illo coincide con le data del fundation del Union Mundial pro Interlingua

11. In qual pais esseva le Union Mundial pro Interlingua fundate le 28 de julio 1955?
  A. Francia
  B. le SUA
  C. Grande Britannia

12. Le lingua del IALA esseva pro le prime vice appellate “interlingua” in un articulo in le jornal francese Le Figaro. Quando esseva isto?
  A. 1924
  B. 1947
  C. 1950

13. Qual esseva le nomine del prime magazin scientific que solmente usava interlingua como lingua redactional?
  A. Danish Medical Bulletin
  B. Spectroscopia Molecular
  C. Unir

14. Un tote branca professional ha essite membros de un organisation national de interlingua. Qual branca?
  A. Le masoneros francese
  B. Le medicos american
  C. Le stenographos del parlamento svedese

15. Qual es le titulos del duo magazines que in januario-februario 1988 se univa in Panorama?
  A. Currero + Novas de IALA
  B. Currero + Heraldo de Interlingua
  C. Heraldo de Interlingua + Unir

16. Ubi esseva le conferentia de interlingua in 1997?
  A. Sheffield, Grande Britannia
  B. Zwolle, Nederland
  C. Strasbourg, Francia

17. Qual association national de interlingua es le plus vetere?
  A. Societate Britannic de Interlingua
  B. Union Danese pro Interlingua
  C. Societate Svedese pro Interlingua

18. Qual serie american de TV usava interlingua?
  A. James Bond
  B. Star Trek
  C. The Man from UNCLE

19. Le prime associato distinguite del UMI, James M. Buchanan (1919-2013), esseva ganiator del premio de Nobel. In que?
  A. biologia
  B. scientia economic
  C. litteratura

20. Le obras basic de interlingua, “Interlingua-English Dictionary” e “Interlingua Grammar”, ambes de 1951, appareva in lor secunde editiones – quando?
  A. 1971
  B. 1956
  C. 1989

21. Le dictionario le plus grande de interlingua jammais ha apparite in...
  A. nederlandese
  B. espaniol
  C. anglese

22. Qual esseva le prime magazin jammais a usar interlingua pro summarios regular?
  A. Blood
  B. Journal of Dental Medicine
  C. Quarterly Bulletin of Sea View Hospital

23. Le Division Interlingua de Science Service publicava un mensual, “Scientia International”, cuje prime edition appareva in...
  A. septembre 1955
  B. julio 1952
  C. augusto 1951

24. Alexander Gode (1906-1970), redactor del “Interlingua-English Dictionary”, esseva plus tarde fundator e prime presidente del ...
  A. Association American de Traductores
  B. Organisation de Standardisation International
  C. le servicio de traduction del Nationes Unite

25. Le IALA esseva dissolvite post haber laborate con interlingua desde 1924. Quando esseva isto?
  A. le 7 de octobre 1959
  B. le 15 de januario 1951
  C. le 31 de martio 1953

26. Multe organisationes influential supportava le labor de IALA. Qui esseva inter illos?
  A. Rockefeller Foundation, Carnegie Foundation e Rotary
  B. le Casa Blanc e le Bibliotheca del Congresso
  C. le Nationes Unite

27. Ubi comenciava le labor lexicographic del IALA in 1924 (usque 1939)?
  A. le Universitate de Columbia
  B. le Universitate de Liverpool
  C. le Universitate de Bruxelles

28. Qual esseva le titulo del mensual de IALA, cuje prime edition esseva publicate in octobre 1951?
  A. Novas de IALA
  B. Novas de interlingua
  C. Notas de interlingua

29. Alice V. Morris (1874-1950) esseva le motor detra IALA ma moriva ante le publication de interlingua in 1951. Que significa le “V.” de su nomine?
  A. Victoria
  B. Vanderbilt
  C. cinque (V)

30. Hugh E. Blair (1909-1967), co-redactor del “Interlingua-English Dictionary” e “Interlingua Grammar”, esseva un homine de multe talentos. Qual de iste talentos non corresponde a ille?
  A. ille sonava le trombon
  B. ille poteva leger 13 linguas
  C. ille habeva un memoria photographic e poteva citar quasi tote lo que ille habeva legite, parola post parola

Le responsas correcte del quiz

Le reponsas correcte del quiz es:
1B: 1992. Lege plus super le Die de Interlingua
2C: Lege plus super Alexander Gode-von Aesch (1906-1970), qui anque esseva le prime presidente del Union Mundial pro Interlingua
3C: Arthur Conan Doyle: "Cinque aventuras de Sherlock Holmes" (ISBN 978-2-36607-034-7) con le aventuas: Un scandalo in Bohemia, Le liga a capillos rubie, Le banda maculate, Le facie jalne e Le figuras dansante. Compra lo ci
4C: Lege plus super André Schild
5B: Le 18e incontro nordic de interlingua in Sigtuna (presso Stockholm), Svedia. In 2026 es arrangiate le 19e incontro nordic de interlingua in Halmstad, Svedia
6C: Plus que un columna e un scheda
7B: 639. Lege plus super Interlingua – un standard international
8A: Interlingua ha gruppos separate pro manuales e litteratura in le systema de classification decimal.
9B: Interlingua.com aperiva pro le publico le 3 de augusto 1997, immediamente post le fin del 13e conferentia international de interlingua in Strasbourg, Francia, durante le qual le dominio esseva comprate
10B: Le 15 de januario 1951 es le data del registration official de "Interlingua-English Dictionary"
11A: Le fundation del Union Mundial pro Interlingua habeva loco durante le prime conferentia international de interlingua in Tours, Francia. Vide le presentation "70 annos con le UMI"
12B: Le 4 de octobre 1947 le grande jornal parisian Le Figaro publicava un interview, ubi le nomine 'interlingua' es usate pro le prime vice (lege plus ci)
13B: Spectroscopia Molecular esseva un magazin scientific specialisate in publicar integremente in interlingua
14C: Tote le gruppo del stenographos del parlamento svedese esseva membros del Societate Svedese pro Interlingua, ubi Bertil Palmquist – un de illes – esseva le presidente (1990-1997)
15B: Le magazin official del Union Mundial pro Interlingua, Currero, fusionava con le private Heraldo de Interlingua e deveniva Panorama in interlingua
16C: Le 9e conferentia international de interlingua esseva arrangiate in 1989 in Zwolle, Nederland
17A: Le Societate Britannic de Interlingua se data de 1956, le Union Danese pro Interlingua de 1960 e le Societate Svedese pro Interlingua de 1964
18C: In le serie televisive "The Man from U.N.C.L.E" le agentes parla "un serie de linguas inclusive Interlingua, le lingua secrete de U.N.C.L.E."
19B: James M. Buchanan (1919-2013) recipeva su premio de Nobel de scientia economic in 1986 del rege svedese Carl XIV Gustaf. Buchanan deveniva in 1990 le prime associato distinguite del UMI
20A: Le duo obras classic de interlingua esseva publicate in lor secunde editiones in 1971
21A: Le dictionario le plus grande de interlingua jammais es le "Dictionario nederlanese-interlingua" per Piet Cleij (3 volumines con 144.230 entratas) e le "Dictionario interlingua-nederlandese" per Piet Cleij (2 volumines de 51.226 entratas) – compra los ci
22C: Le prime magazin a usar interlingua regularmente pro summarios esseva Quarterly Bulletin of Sea View Hospital
23B: Le Division Interlingua de Science Service publicava le prime edition del magazin scientific mensual integremente in interlingua, Scientia International, in julio 1952
24A: Alexander Gode esseva cofundator e le prime presidente del Association American de Traductores 1960-1963, e le organisation da cata anno le Medalia Alexander Gode a un individio o institution pro recognoscer un servicio excellente de traduction e interpretation. Isto es le premio le plus prestigiose del organisation
25C: Le International Auxiliary Language Association (IALA) esseva dissolvite le 31 de martio 1953.
26A: Inter le multe organisationes influential que supportava le labor del IALA esseva Rockefeller Foundation, Carnegie Foundation e Rotary.
27B: Le labor lexicographic del IALA comenciava in 1924 in le Universitate de Liverpool in Grande Britannia. In 1939, a causa del Secunde Guerra Mundial, le datos linguistic e le bibliotheca es transferite a Nove York, SUA
28A: Le mensual de IALA, publicate in interlingua desde octobre 1951, se appellava Novas de IALA. Quando IALA claudeva le 31 de martio 1953, Hugh E. Blair e Alexander Gode in le Division de Interlingua sub Science Service comenciava publicar le successor, Novas de Interlingua
29B: Illa se appellava Alice Vanderbilt Shephard Morris (1874-1950). Lege le portrait "Homage a un femina extraordinari"
30A: Hugh E. Blair non sonava le trombon – ma ille poteva leger 13 linguas e habeva un memoria photographic, assi que ille poteva citar quasi tote lo que ille habeva legite, parola post parola