Historia de interlingua
Biographias A-Z

Alice Vanderbilt Shepard Morris

Statos Unite de America
Nascite: 7 de decembre 1874 - Morite: 15 de augusto 1950

Alice V. Morris. Designo: Ric BergerAlice Vanderbilt Shepard Morris - le nomine es synonyme con un personalitate extraordinari. Su persistentia significava le fundation in 1924 del International Auxiliary Language Association, e 27 annos plus tarde esseva publicate le resultato de un quarto de seculo de labor: interlingua.

Illa nasceva in 1874 in New York. Su granpatre esseva Cornelius Vanderbilt (1794-1877), le american rege ferroviari, qui poneva le majoritate del rails sur le continente nordamerican. In New York, illa iva in schola private. Plus tarde illa esseva educate al Radcliffe College del Universitate Harvard. Le Universitate de Syracuse la faceva doctor honorari de scientia litterari in 1931 "como recognition special del campo de studios que vos ha facite vostre proprie, le campo del international lingua auxiliar".

Alice V. MorrisAlice V. Morris esseva desde su juventute tormentate de un sanitate debile. Un parte del tempore ille passava jacente sur un sofa. Ma iste maladia deveniva le causa que le recerca linguistic probabilemente le plus extensive in le historia mundial comenciava. Durante le sojorno a un clinia Alice V. Morris incontrava le idea que le problemas lingual del mundo pote esser solvite per trovar un nove lingua. Al clinica, illa trovava un brochure que narrava del lingua artificial esperanto, inventate in 1887 per le oculista polonese Ludwig Lazarus Samenhof. Alice V. Morris esseva capturate del idea de un lingua auxiliar neutral que poteva facilitar le communication inter le gente. Illa narrava de su discoperta, e un amico del familia, Frederick Gardner Cottrell, plus tarde celebre chimico american, persuadeva Alice V. Morris a essayar solver le difficile problema de un lingua auxiliar - ma in un maniera scientific, impartial e neutral. Cottrell esseva alumno del famose scientista german, Wilhelm Ostwald, e habeva durante longe tempore essite occupate del problema.

Con su sposo, Dave Hennen Morris, Alice V. Morris alora fundava IALA in 1924. Illa habeva studiate esperanto, dunque le neutralitate de IALA esseva pro illa sovente un dilemma. Durante plus que 25 annos illa participava in cata phase del labor de IALA. Illa remaneva le secretario honorari de IALA usque a su morte in 1950 e dirigeva su departimento de recercas. In le annos 1930 illa editava le Serie de Linguas del IALA, e illa esseva le co-autor con Mary C. Bray del "General Report" de IALA in 1945.

Julia S. Falk, del Michigan State University, publicava in 1999 le libro "Women, Language and Linguistics - Three American Stories from the First Half of the Twentieth Century" (320 pp.). Le tres feminas portraitate es Alice Vanderbilt Morris, Gladys Amanda Reichard e E. Adelaide Hahn.

Su grande interesse pro linguas auxiliar la faceva membro del Academia pro Interlingua (le nove nomine a Latino sine flexione), cuje quartiero general esseva in Turin in Italia, ma que post le Secunde Guerra Mundial esseva reorganisate in Nederland.

Illa esseva membro honorari del societate Phi Beta Kappa. In ultra, illa functionava como vice-presidente del World Service Council del YWCA in le Statos Unite.

Le pictor american John Singer Sargent la pingeva in 1888 (oleo sur canvas). Le pictura esseva exhibite al Exposition Columbian Mundial in Chicago in 1893 con octo altere portraits.

Alice V. Morris moriva in 1950 in New York, 75 annos de etate e solmente circa un medie anno ante que le obra de su vita, interlingua, esseva publicate per le "Interlingua-English Dictionary".

Revidite: 2006-12-29

Cerca le Historia de interlingua per FreeFind

LEGE ANQUE...
Homage a un femina extraordinari - portrait de Alice V. Morris