Tote effortios de representantes e interessatos es colligite le 15 de januario cata anno pro attraher le attention del mundo a interlingua.

UMIDie de Interlingua  Le 15 de januario es cata anno le international Die de Interlingua. In tote le mundo, organisationes e representantes de interlingua, in collaboration con le membros, face in iste die qualcosa extra pro attraher le attention a interlingua e su enorme possibilitates.

Desde 1992, le die de interlingua ha essite organisate cata anno. Le intention es colliger un serie de activitates parve o plus grande a precisemente iste data, nam multe parve rivettos pote, como on sape, devenir un fluvio spumante. Omnes es dunque incoragiate a facer un effortio special – e preferibilemente public – pro interlingua a justo iste die ... e il es permittite prender uso de tote le septimana.

Le propositiones a activitates non solmente vale pro le Die de Interlingua. Illos pote ben esser usate durante tote le anno:

● Contacta le bibliotheca local e recipe del organisation national de interlingua un pila de brochures o lection 1 del gratuite curso de correspondentia que pote esser placiate in le bibliotheca.

● Demanda a tu medico o dentista, si tu pote placiar materiales informative super interlingua in le sala de attender.

● Arrangia un parve exposition super interlingua in le casa cultural local.

● Assembla alcun amicos pro un curso fulmine de interlingua con te como instructor (trova multe materiales gratuite ci: Dictionarios e cursos e Inseniamento).

● Face un presentation de interlingua in un club (o un organisation) del qual tu es un membro.

● Scribe un (breve) salute de interlingua a un amico, o trova nove contactos de interlingua in Internet (visita p.ex. le Union Mundial pro Interlingua a www.interlingua.com).

● Participa in Twitter con le etiquetta #DieDeInterlingua, o organisa activitates con un pagina de evento in Facebook.

● Scribe a un o duo interprisas o autoritates pro informar los super le possibilitates de interlingua in lor communication – anque in le sitos de Internet.

● Usa mesme un hora pro ameliorar tu interlingua, p.ex. per leger un libro (inspiration: www.interlingua.com/litteratura), ascoltar Radio Interlingua o usar le materiales comprehensive de cursos (p.ex. in www.interlingua.com/instruction.

Reporta de tu activitates – e possibile resultatos – al redaction del Panorama. Tu pote usar le formulario Contacto pro inviar le message al redaction del Panorama.