Ezra Clark Stillman

Statos Unite de America
Nascite: 1907 - 12 de april 1995

Ezra Clark Stillman esseva un del patres de interlingua como membro del international equipa recercatori del "International Auxiliary Language Association" (IALA), que in 1951 publicava interlingua. Esseva ille qui crystallisava le criterios de extraher le vocabulario international in 1940.

Ille nasceva in Eureka, Utah, e iva al Universitate de Michigan. Post reciper su graduation de Maestro in Anglese, ille inseniava la durante plure annos. Pois ille laborava pro le Fundation Belgic-American Educational ("Belgian-American Educational Foundation") como secretario e participava como isto i.a. in le Dece-tertie Assemblea American in Arden House, Harriman, New York, le 1-4 de maio 1958, super "Le Statos Unite e Africa", ubi ille es un de multe signatarios.

In Bruxelles, ille habeva contactos con le ambassator american, Dave Hennen Morris, e su sposa, Alice V. Morris, le fundator de IALA. Ille deveniva assistente pro professor William E. Collinson, qui desde le initio in 1936 gereva le labor lexicographic de interlingua al Universitate de Liverpool in Grande Britannia. E. Clark Stillman elaborava le programma de tres annos de recercas e experimentation.

In 1937 Collinson, qui esseva esperantista, se retirava, e Stillman assumeva le carga de reimplaciar le como Director de Recercas. Stillman habeva un sympathia in le direction naturalista del linguistica, lo que recreava le fide in le impartialitate del labor de IALA. In 1938, ille deveniva le secretario del Comité de Accordo. Quando le Secunde Guerra Mundial fortiava le equipa a cambiar domicilio, Stillman in 1939 colligeva un nove equipa international in Nove York e gereva le detaliate labor philologic, usque ille in 1942 esseva empleate in le Departimento Statal. Alexander Gode deveniva su successor como directos de recercas.

Post le guerra, Stillman deveniva partenario in Lathrop C. Harper, Inc., un venditor de libros rar in New York, usque ille esseva pensionate.

Le professor francese André Martinet esseva chef de IALA ab 1946 a 1948, quando le assistente Alexander Gode deveniva le principal director de recercas. Gode e Stillman habeva collaborate durante lor labor commun in le publication del serie de manuales "Spanish at Sight" (Thomas Y. Crowell Co., 1943; reimpression: New York, F. Ungar Pub. Co., 1962, 102 pp.), un methodo pro apprender linguas solmente per designos e textos in le linguas mesme. Alexander Gode continuava le serie con "Portuguese at Sight" (Thomas Y. Crowell Co., 1943) e "French at Sight" (Thomas Y. Crowell Co., 1945). Le mesme methodologia esseva usate in "Interlingua a Prime Vista" (Storm Publishers, 1954).

Ille esseva durante 26 annos stipendiato a The Pierpont Morgan Library, le ultime duo annos ante su morte como "Fellow in Perpetuity". In 1975, ille esseva precedite per su sposa, Frances Jennings Stillman, con qui ille collaborava super multe traductiones de poesia belgic ab francese e flamingo ("Lyra Belgica, in English translation by Clark and Frances Stillman" New York, Belgian Government Information Center, 1950).

E. Clark Stillman esseva anque un poeta e traduceva poemas. Duo annos ante su morte, ille publicava "Man on the beach : observations in pseudo-light verse" (Bruxelles, Cultura, 1993, 144 pp.; "Issued on September 7, 1993, the day of the opening of the exhibition From manuscript to print: books of hours from the Clark Stillman collection in the Pierpont Morgan Library, New York"; le Library of Congress in Washington ha numero XC de un edition de 321 copias, 222 numerate ab 1 a 222 e 99 numerate per cifras roman, signate per le autor).

E. Clark Stillman formava un private collection importante de manuscriptos medieval e libros imprimite multo precocemente, que ille generosemente donava al bibliotheca ante su morte.

Ille moriva in le Citate de New York post un longe battalia contra le cancere.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua