Dave Hennen Morris

Statos Unite de America
Nascite: le 24 de april 1872 - (non cognite) 1944

Dave Hennen Morris nasceva in New Orleans como le filio de Cora Hennen e John A. Morris. Ille graduava ab Harvard University in 1896 e deveniva advocato e plus tarde diplomate. Tresorero pro "International Auxiliary Language Association" (IALA) ab le fundation in 1924 a su morte in New York, 1944, quando le filio, Lawrence, assumeva le posto.

Dave Hennen Morris esseva le "Ambassator extraordinari e plenipotentiari" (le titulo official, secundo le american State Department) del SUA in Belgica e le "Inviato extraordinari e ministro plenipotentiari" in Luxemburg. Ille esseva appunctate le 18 de maio 1933 e presentava su litteras de credentia in Bruxelles le 6 de julio 1933. Ille resideva in Bruxelles ma anque esseva accreditate a Luxemburg, ubi su litteras de credentia esseva presentate le 4 de novembre 1933.

Durante le sojorno in Belgica, su sposa, Alice V. Morris, e ille mesme succedeva continuar le labor de crear contactos international pro ganiar supporto al lingua que esserea plus tarde interlingua. Le 5 de maio 1937, ille abandonava su posto in Bruxelles pro retornar a New York.

In 1937, ille deveniva Doctor honoris causa al Universitate de Gent in Belgica. Le conferer de iste titulos del universitate eveniva assatis irregularmente, dependente del propositiones presentate per le Facultates. Il se tractava le plus sovente de professores qui habeva essite invitate per le universitate a dar conferentias o series de lectiones.

Dave Hennen Morris esseva vice-presidente del Corporation de Recercas e consiliero in le Fundation Belgic-American Educational, ubi Ezra Clark Stillman esseva le secretario.

Redaction: Th. Breinstrup, Ingvar Stenström e Jesper Olsson
Copyright © 2001-2007 Union Mundial pro Interlingua