Skip navigation.
Home

Contos in interlingua pro infantes

Le presidente del UMI, Sven Frank, traduce contos del fratres Grimm e Hans Christian Andersen pro nove libro in interlingua pro infantes.

UMIContos in interlingua  Parentes in tote le mundo pote ora narrar le contos favorite in interlingua a lor infantes - o le infantes pote mesme leger los.

Le presidente del Union Mundial pro Interlingua, Sven Frank, es le traductor de un toto nove libro, que appareva le 1 de augusto immediatemente post le fin del 13tie incontro nordic de interlingua, con novem contos del fratres Grimm e Hans Christian Andersen - contos que ille ha presentate al optime publico possibile: su filio Leo qui parla anque interlingua, e qui anque es sur le copertura del libro.

"Contos in Interlingua" contine novem contos ben cognoscite: "Blanca-Nive e le septe nanos", "Cappucietto rubie", "Hans e Gretel", "Le fede anatetto", "Le flautista de Hameln", "Cinerella", "Le princessa dormiente", "Rapunzel" e "Le musicantes de Bremen". E como se dice sur le copertura:

"Le contos del fratres Grimm o de Hans Christian Andersen es famose in tote le mundo. Iste collection de contos breve es scribite in le lingua international Interlingua. Isto significa que plus que 600 milliones personas in tote le mundo pote comprender le contento ab le initio."

Le costo es 9,00 euros + porto postal. Le libro ha 77 paginas e es in le practic formato paperback (ISBN 978-1-291-00707-7). Le ligamine directe es http://www.lulu.de/shop/sven-frank/contos-in-interlingua/paperback/product-20307612.html, ma tosto on pote trovar le libro anque in www.interlingua.com/lulu - plus facile a memorar.

In avantia existe un grande collection de contos per Hans Christian Andersen, le autor famose (1805-1875), in interlingua. ("Contos e historias" e "Septe contos per Hans Christian Andersen" e "Ab le tresor de contos de H. C. Andersen") In le Bibliotheca electronic in interlingua, on anque trova "Contos de Grimm", "Agreste" per H.C. Andersen, "Le porchero" per H.C. Andersen, "Le pueretta con le flammiferos" per H.C. Andersen" e - in le e-libro "Scriptores scandinave 2" - "Le nove vestimentos del imperator" per H.C. Andersen.

Initio del pagina