Historia de interlingua

Le arte celate in paccos postal

Imballages del ex-secretario general contineva pecias de arte al interior. Illos pende hodie al muros in Danmark.

Arte de Ric Berger. Photo: Thomas BreinstrupPer Thomas Breinstrup

Normalmente le imballage de paccos postal non es specialmente interessante. Totevia, il ha exceptiones.

Le suisso Ric Berger, qui de 1959 a 1963 esseva le secretario general del Union Mundial pro Interlingua, esseva un active scriptor e imprimitor. Ille produceva enorme multitudes de materiales in e super interlingua, que ille expediva a tote le mundo. Ma al mesme tempore ille esseva un bon artista.

E assi arrivava un die cassas con materiales de Suissa al activista danese, Jørgen Kofod-Jensen. E le interior de iste cassas non esseva in colores brun e triste. No, illos esseva pingite per Ric Berger. A Jørgen Kofod-Jensen placeva tanto le motivos que le cassas mesmo hodie - 2005 - es placiate sur le muros como decoration del casa. Illos certo non debeva esser jectate via.

Revidite: 2006-12-29