Le nove amica digital va promover le uso active de interlingua con traductiones, lectiones e informationes general.

UMIPanorama in interlingua  Chatina es un nove "amica digital", qui pote adjutar omnes a apprender interlingua. Le iguanetta multicolor es intelligentia artificial developpate specialmente pro promover interlingua e inseniar a alteres le lingua.

On pote scriber in interlingua o su proprie lingua (usque a 1.300 signos per message), e Chatina alora responde in interlingua plus le lingua usate. Assi on pote "apprender e comprender interlingua in un maniera simple e agradabile".

Le veterano de interlingua, Jacinto Jay Bowks in le SUA, ha developpate Chatina in collaboration con le societate de software Softw Cloud in Colombia. Le uso de Chatina es gratuite. Visita https://chatina.interlingua.education o www.scholainterlingua.com.

Reguarda le video de musica con le presentation de Chatina e le idea detra illa. Illa pote assister con traductiones, lectiones e informationes general.

Chatina pote esser usate ora in un version beta ante le lanceamento official in le Die de Interlingua le 15 de januario 2026, quando interlingua celebra su 75e anniversario.