Estate sur le plagia
Memora le audiolibros, le e-libros, le libros “normal” e materiales e cursos de e in interlingua pro le vacantias estive.

Le estate es ci con longe vesperes lucide. Usa le occasion pro avantiar con interlingua. Il ha multe possibilitates – anque multe materiales gratuite – pro le vacantias estive.

UMI  Audiolibros: Il ha multe audiolibros e bon podcasts que vale esser audite, e que al mesme tempore es instructive. Omne usque ora 44 emissiones de Radio Interlingua (www.interlingua.com/radio) pote esser discargate como files MP3 con interessante narrationes, bon musica, interviews, novas e lectura per multe voces differente. Le Bibliotheca digital in interlingua (www.interlingua.com/e-libros) ha plure audiolibros. Trova ci p.ex. "Le Trolls", "Un scandalo in Bohemia" (Sherlock Holmes), "Ed Mort – le trappa", "Dece-duo conversationes", "Le donos del fee" e "Un micre fabula" (ab "Paletta", obras original in interlingua) e plures del "Dece contos" (per Alexander Gode-von Aesch).

  

UMI  E-libros: Multissime e-libros pote esser discargate e legite sur tablettas o computatores normal, toto in formato PDF. Le Bibliotheca electronic in interlingua (www.interlingua.com/e-libros) es supplementate sempre. Ci il ha gratuite romanes, novellas, litteratura professional e mesmo bandas designate in interlingua. Tres e-libros toto nove ha justo essite addite: "Un reliquia del era pliocen" per Jack London, "Psalmos e canticos" per abbate Raymond Volf e "Duo fabulas" per le autor russe Mikhail Kuzmin.
Le Societate Svedese pro Interlingua ha anque publicate un serie de e-libros gratuite in www.interlingua.nu/elibros.

UMI  Multitudes de libros: Constantemente appare nove libros in interlingua, original como traducite, litteratura professional e belletristic, dunque il ha assatis inter le quales seliger pro bon dies estive de leger. Ma ordina le libros rapidemente pro assecurar que illos arriva in tempore. Con le Servicio de Libros UMI (www.interlingua.com/libros) e le casa editorial Lulu (www.interlingua.com/lulu) on ordina e paga in linea. Memora comprar un bon dictionario.

  

UMI  Cursos e exercitios: In le section Inseniamento (www.interlingua.com/instruction-national) il ha gratuite cursos e vocabularios, p.ex. le curso in 15 lectiones pro comenciantes in anglese, danese, espaniol, germano, italiano e norvegiano. E in www.interlingua.com/instruction on trova un serie de "Cartas nordic" – cartas postal con breve textos in interlingua e cinque questiones a cata carta – plus le contos amusante del stupide molbos danese, con explicationes e questiones.

 

  BON LECTURA ESTIVE

Ecce alcun bon titulos in interlingua:

AMATE SEMPRE: Un del absolutemente plus belle e plus universal historias de amor, dice le instructor de films, Pernilla August. Justo apparite in interlingua! – Hjalmar Söderberg: Le joco seriose, 202 pp., 8,86 euros

PINOCCHIO: Le conto del amate pupa de ligno in traduction maestrose e bellemente illustrate. – Carlo Collodi: Pinocchio, 96 pp., 10 euros

HERMAN BANG: Tres obras maestrose ab un del plus grande autores danese, eminentemente traducite. – Herman Bang: Tres novellas, 104 pp. ill., 10 euros

ESTIVEMENTE: Belle e capturante roman de amor de 1930 per le jornalista e autor german super le vita de un castello svedese. – Kurt Tucholsky: Le palatio Gripsholm, 144 pp., 12 euros


INTERTENIMENTO: Pecia pro theatro de pupas a mano in sex actos con cantos super como facer auro. Bon intertenimento e bon linguage. – Jørgen Lund: Le alchimista relegate, 28 pp., 3 euros