Le magazin nordic de interlingua entra in su anno jubilari.

  Duo paginas esseva toto, quando le prime edition del magazin nordic de interlingua, Actualitates, appareva pro le prime vice in novembre 1959. Isto es ora ante 50 annos.

"Notas de interlingua" esseva le titulo de alora, le redactor esseva Bent Andersen, hodie le vice-presidente del Union Danese pro Interlingua. Le magazin deveniva le base pro fundar le 7 de novembre 1960 le Union Danese pro Interlingua. Illo anque deveniva le ligamine perseverante inter le usatores de interlingua in le paises nordic.

Desde 1964, illo anque deveniva le magazin pro membros del Societate Svedese pro Interlingua, desde 1992 pro anque le Union Norvegian pro Interlingua e desde 1998 pro membros del Association Finlandese pro Interlingua.

Con le edition numero 171 de Actualitates (ISSN 1395-2455), le magazin entra in su anno jubilari. Durante le prime multe annos le apparition esseva un poco irregular, durante 1983 le magazin appareva sex vices, ma le numero de paginas cresceva sempre e ha desde januario 1996 essite stabile: 12 paginas omne tres menses con novas, lectura, recensiones de libros, informationes e multo plus in danese, svedese, norvegiano e - naturalmente - interlingua.

Actualitates ha assi devenite le prova del bon collaboration nordic que anque se effectua in le biennal incontros nordic de interlingua, del quales le plus recente esseva in Linköping, Svedia, in 2008, le proxime essera in 2010.

Actualitates es un parte importante del labor informative del quatro organisationes nordic de interlingua. Alcunos lo ha appellate un brochure de information sub revision constante, inviate a nove interessatos, politicos in plure paises etc.

Redactores de Actualitates: Bent Andersen (1959-1962). Hans Neerbek (1963). Bent Andersen (1963). H.P. Frodelund (1964-1971). Jørgen Kofod-Jensen (1972-2001). Erik Enfors (2001-2005). Thomas Breinstrup (2006-).