Le 18ve conferentia international de interlingua in julio 2009 essera plen de experientias, excursiones ... e surprisas. Inscribe te - e tu familia - hodie.

UMI  Le grande lineas del programma pro le 18ve conferentia international de interlingua le 25 de julio al 1 de augusto 2009 es ora preste, e le UMI invita omnes a inscriber se si tosto como possibile.

Le conferentia habera loco in le parve urbe Kirchheimbolanden, 80 km de Frankfurt am Main, in Germania e es pro tote le membros del Union Mundial pro Interlingua. Le septimana conferential include cursos pro comenciantes, cursos pro avantiates, cursos pro juvenes, intertenimento, discussiones e excambios de ideas pro promover interlingua, excursiones e multo, multo plus. Cata die un programma touristic essera proponite al familias qui non sequera le cursos e sessiones.

Le inscription al conferentia es aperte, dunque le UMI incoragia omnes a inscriber se si tosto como possibile pro esser secur de haber le typo de camera que on prefere. Isto anque facera le preparationes plus facile, si on se inscribe in bon tempore. Trova ci le scheda de inscription pro le conferentia

Le ultime data de inscription es le 1 de april 2009.

Le precios de participation es inter 295 e 425 euros dependente del sorta de camera que on desira (camera singule, camera duple etc.). Le precio include toto: pernoctation, repastos, excursiones etc.

Le UMI spera poter dicer a revider a multissime personas in Kirchheimbolanden in julio.

Lege anque:
 Le programma in grande lineas - habe appetito a participar
18ve Conferentia International de Interlingua - le pagina principal del conferentia
Conferentia international de interlingua in Germania in julio 2009
Scheda de inscription pro le conferentia - le ultime data de inscriber se es le 1 de april 2009
Urbe conferential in interlingua - presentation de Kirchheimbolanden in interlingua per le burgomaestro Klaus Hartmüller
Tote vias va a "Kibo" - assi tu trova le via al conferentia