|
 |
Mi prime contacto
con interlingua
Panorama ha demandate a un serie de usatores de interlingua, como esseva lor prime contacto con le lingua. Lor narrationes es instructive, a vices curiose, surprendente e amusante.
(Publicate in Panorama in Interlingua, januario-februario 2004)
THOMAS BREINSTRUP (Danmark), redactor del Panorama e
secretario del Union Danese pro Interlingua:
Mi interesse pro linguas ha sempre essite grande – e pro saper
qualcosa super illos e pro de facto apprender un poco. Pro isto le
local Bibliotheca de Taastrup anque esseva vacuate systematicamente de
manuales e cassettas. Durante le tempore, in 1980, io toccava le thema
"linguas auxiliar" (per alcunos appellate "linguas
artificial").
Io trovava un ancian curso secundo le methodo natural de esperanto.
Io esseva fascinate per le methodo e comenciava studiar le libro in
casa. Immediatemente, le structura stricte de esperanto me faceva
pensar que isto esseva facile a apprender, ma post solmente septe
lectiones io lo trovava troppo artificial pro poter functionar.
Simultaneemente io continuava studiar encyclopedias pro apprender plus
de iste linguas si extraordinari. Io trovava informationes de
interlingua e le adresse del administrator del Union Mundial pro
Interlingua, a ille tempore le danese Bent Andersen, que io contactava
per littera.
Ille me inviava un spisse littera con materiales informative,
ancian editiones del magazin scandinave Actualitates etc. Le
"pacco" arrivava in augusto 1980, poc septimanas post que io
habeva comenciate le prime de tres annos in le gymnasio. Io esseva
malade e debeva remaner in mi lecto. E alora le multe material a leger
arrivava a un tempore multo apte. Io habeva multe tempore a leger lo.
Io lo legeva e relegeva, esseva surprendite per le facto que io
comprendeva tanto, ma considerava ancora tote le cosas pro alcun
septimanas ante de demandar plus de materiales – e alora io habeva
nulle dubita plus.
Io deveniva membro del Union Danese pro Interlingua (DIU),
comenciava in augusto 1981 publicar mi proprie magazin, "Heraldo
de Interlingua" (que in 1987 fusionava con "Currero" e
deveniva Panorama), e desde septembre 1981 io ha essite consiliero –
ora secretario – del DIU.
Revidite: 2006-12-29 |
|
|
