Jonas Negalha

Brasil
Nascite: le 26 de april 1933
Morite: le 12 de april 2007

Poesia mundial ha sempre essite le nutrimento pro Jonas Negalha, e pro isto il esseva toto natural que interlingua capturava su interesse, e ille capturava usatores de interlingua in tote le mundo.

Jonas de Amaral Medeiros Negalha nasceva in Lomba da Maia al Insula de São Miguel in le archipelago del Azores como filio de António de Medeiros Negalha e Maria de Jesus Amaral Bulhões. In 1946, quando ille cambia domicilio a Ponta Delgada, ille comencia su carriera litterari per le prime composition, "Versos ao Marquês de Pombal".

Pois seque un ver production de litteratura - obras grande e minus grande - del scriptor diligente ... poeta, scriptor, philosopho, diplomate in litteratura (in 1972) e in philosophia (1976), plus tarde professor, membro del Union Brasilian de Scriptores e altere institutiones international. Su obras ha essite traducite in numerose linguas, e ille mesme habeva un grande interesse pro linguas e linguistic. Per le redactorato de plure publicationes ille contribueva a presentar co-autores minus cognoscite ab grande e parve paises a un publico global, e ille mesme traduceva le obras de multe collegas in anglese e portugese. In 1970 ille esseva presentate como candidato al Premio Nobel de Litteratura - un honor que ille totevia non obteneva.

Jonas Negalha viveva le majoritate de su vita in Brasil, ubi ille moriva in São Paolo.

Ille ha contribuite con numerose poemas e articulos philosophic pro primo Currero, pois Heraldo de Interlingua.

Inter multissime libros in interlingua - scribite originalmente in interlingua o traducite in interlingua per ille mesme - es istos:

Negalha Jonas: Le naufragio
Editiones Aquario, 1975, 36 pp., A5.

Negalha, Jonas: Le die le plus curte
(Titulo original: O dia mais curto)
Traducite per Sven Collberg. 1975, 48 pp., A5.

Negalha, Jonas: Incendio in le nave
Poemas sur le pollution.
1977, 26 pp., A5.

Negalha, Jonas: Breve curso de metaphysica.
Servicio de Libros UMI, 1981, 100 pp., A5.

Negalha, Jonas: Poemas in Interlingua
Editiones Aquario, 1975, 40 pp., A5.

Revidite: 2012-09-09

Redaction: Th. Breinstrup, Ingvar Stenström e Jesper Olsson
Copyright © 2001-2010 Union Mundial pro Interlingua