Historia de interlingua
Biographias A-Z

Åsmund Knutson

Norvegia
Nascite: 12 de maio 1933

Esseva un articulo in le magazin mensual Illustreret Vitenskap (Scientia Illustrate) que inspirava Åsmund Knutson a interessar se pro interlingua - e devenir cofundator del Union Norvegian pro Interlingua.

Åsmund Knutson ha nascite in Oslo, filio de Kristoffer e Signe Emilie Knutson. Ille quitava le gymnasio real in 1952 e deveniva ingeniero civil (B.Sc. 1st class honours) del University of Glasgow e The Royal College of Science and Technology (ora: University of Strathclyde) in 1958 como ARCST 1st class honours. Inter 1952 e 1954 ille esseva corporal e sergente temporari in le artilleria de campo.

Ille ha desde 1958 essite membro del Association de Ingenieros Civil Norvegian (Norske Sivilingeniørers Forening). Post 31 annos al Directorato Statal de Pontes e Stratas, ubi ille esseva chef del Officio de Construction de Stratas e Asphalto del Laboratorio Stratal Norvegian de Recercas, ille deveniva pensionario. Ante isto ille habeva laborate como consulente private durante sex annos e como consulente geotechnic al Officio Municipal de Oslo durante tres annos.

Ille deveniva membro del Union Danese pro Interlingua ma habeva contacto con le copula active Ole e Dagrun Øiseth, e in commun illes fundava le 27 de april 1992 le NIU. Åsmund Knutson deveniva le prime presidente del NIU e esseva vermente active, usque su labor professional in le norvegian Laboratorio Stratal in 1995 le fortiava a lassar su posto a Arvid Eriksen, capitano.

Åsmund Knutson esseva pensionate in junio 1998. Isto le ha date plus de tempore pro un altere occupation, su ingagiamento politic. Ille esseva le presidente regional del partito Ringerike Senterparti e membro del consilio regional del Senterpari usque 2000. Ille al mesme tempore representava Senterpartiet in le consilio municipal in Ringerike.

In novembre 2001, Åsmund Knutson reassumeva le posto como presidente del Union Norvegian pro Interlingua e prendeva immediatemente le initiativa de un forte revitalisation del organisation.

In 1991, Åsmund Knutson obteneva su Ph.D. in scientia nutritional del Life Science Institute. Ille es membro perpetue del Societate Vegetarian Judee e le Societate del Studios Samaritan. In ultra ille ha desde 1973 essite ministro del congregation del YHWH in Norvegia.

Åsmund Knutson maritava Ruth in 1959. Illes ha tres infantes - Toril, Yngvill e Kristoffer - e 12 graninfantes.

Revidite: 2006-12-29