Historia de interlingua
Biographias A-Z

Allan Kiviaho

Finlandia
Nascite: le 2 de novembre 1935

Allan Kiviaho al conferentia international de interlingua in Bulgaria, 2003. Photo: Thomas Breinstrup"Inorthodoxe" es forsan le notion le plus apte pro Allan Kiviaho, presidente del Association Finlandese pro Interlingua.

Toivo Allan Kiviaho nasceva in Alavus. Su patre, Hugo Gunnar Konstantin Haane (1878-1952), esseva le prime doctor veterinari de Finlandia (Dresden-Giessen 1900-1904).

Le carriera scholar de Allan Kiviaho esseva in su parolas "minus quam brillante". Ille e su camerada de classe, un famose footballista e musico Kaj Pahlman, esseva expellite ex le prime classe de gymnasio al fin del anno 1953. Peculiarmente Allan Kiviaho, sin esser quidem un studente, ha postea inseniate mesmo in un universitate (un curso de un septimana al Universitate de Tampere) e a multe cursos de informatica (non confunde isto con computatores) que esseva parte del programma de education post-graduate al Schola Polytechnic de Helsinki-Espoo.

Post le servicio militar (1955-1956), ille laborava in le bibliotheca industrial, post 1962 como bibliothecario al Oy Strömberg Ab, un famose fabricante de merces electric como motores, generatores, transformatores e altere apparatos. Oy Strömberg esseva fundate in 1889 e es hodie un parte del gigante multinational, ABB. Un parve gruppo de juvene ingenieros sub un ingeniero multo distinguite, Martti Harmoinen, professor h.c. 1995, developpava durante le 1970s e 1980s un invertor de frequentia pro regular le velocitate de rotation del motor asynchrone de curte circuito, que deveniva un successo mundial - e un del sectiones strategic del ABB. In martio 2003 professor Harmoinen apportava su libro "SAMIn tarina" (Saga del SAMI", Strömberg Asynchronous Motor Invertor). In iste libro es un rubrica: "Legendari Allan Kiviaho". Curiosemente Allan Kiviaho recipeva in 1968 laude etiam de un altere grande eminente in technica electric, ingeniero Tauno Hakanen, un nomine famose al branca de motores asynchrone. 

In 1975 le "legendari" Allan Kiviaho veniva a un altere compania finnese de fama mundial, KONE Corporation, producente de ascensores e grues, como informatico. Ille debeva acquirer pro le corporation informationes technic e economic. KONE esseva probabilemente le prime compania industrial in Europa que comenciava usar bancas de information american in linea per computatores. E in 1983-1985 Allan Kiviaho laborava in Suissa, fundante un centro de servicios global de information computatorisate pro le firma in omne continentes.

De 1985 a 1986 ille laborava a Hyvinkää, ubi esseva le fabricas principal del KONE Corporation.

In 1986 ille entrava in Uusi Suomi, un jornal respectate e vetule (fundate in 1847) con le carga principal de fundar un archivo electronic. Le jornal luctava in grave crise economic, e le catastropho economic in Finlandia lo occideva al initio de 1990s. Ab 1987 Allan Kiviaho comenciava laborar al administration de computatores de "Uusi Suomi Oy" que consisteva de plus que 10 jornales e magazines. In 1990 ille esseva nominate administrator de systemas computatorisate a departimentos de annuncios de alcun jornales e magazines (super toto "Kauppalehti", un successose jornal commercial) in un corporation que deveniva "Alma Media", un multo grande casa de medios (jornales, magazines, television, radio, mercar electronic).

Sempre plen de ideas e energia, ille cerca resultatos. Su humor captiose - sarcastic e directe - combinate con un talento pro chaco e un passion pro le militar face Allan Kiviaho pensar in strategias e symbolos. Su sapientia historic e militar es enorme, su messages electronic es romanes, plen de informationes. Allan Kiviaho esseva le motor del traduction del Constitution Europee in interlingua. Assatis anarchisticamente, como sempre, ma sempre con un vista clar al scopo. Le problema esseva que le adjutatores non lo videva sempre clarmente.

Ille ha multe hobbies que ille ha mentenite, malgrado le facto que computatores sovente demanda multe tempore, e que ille de januario a novembre 1990 laborava quasi cata septimana septe dies ("de facto sovente novem dies, proque le sabbato-dominica on pote facer quatro dies de travalio," como ille mesme dice). Inter le interesses es historia militar, volleyball, chacos e un amor special pro Estonia e le altere statos baltic, e Turchia. 

Desde su pueritia ille se interessava pro linguas artificial. Ja in circa 1944 ille comprava le dictionarios e grammaticas de esperanto de Vilho Setälä, esperantista finlandese, e remaneva un esperantista "latente" pro decennios. In 1995, quando le Union Europee comenciava esser actual mesmo pro Finlandia e le besonio de un lingua commun pro cosas practic pareva esser imminente, Allan Kiviaho comenciava studiar esperanto seriosemente. Ille totevia tosto arrivava al conclusion que esperanto esseva troppo bizarre, mesmo "bastardic" pro esser utilisabile como un "lingua franca" pro Europa. 

Ille veniva le via usual, non sapente que ille promenava a un sentiero jam fullate dur: Ille comenciava crear esperanto reformate (con nulle signos diacritic, nulle designentias -j, parolas latin o romance in loco de illos "bastardic", nulle phonemas bizarre), pois latino con grammatica de esperanto reformate, pois latino con grammatica rationalisate. Curiosemente ille nominava un de su linguas experimental "Auli" (Auxilingua), le nomine del veliero de Edgar de Wahl ante le Secunde Guerra Mundial.

"In le primavera de 1996 io trovava in internet interlingua e immediatemente relisava que in illo io habeva un lingua auxiliar que completemente correspondeva mi ideal de un lingua planificate," ille dice e sublinea que ille non considera interlingua como un lingua "auxiliar" ma como un del linguas principal. E ille con enthusiasmo lucta contra le position de anglese que ille vole relegar a su placia proprie, "equal inter altere linguas europee, non plus, non minus!"

In 1999, Allan Kiviaho fundava le Suomen Interlinguayhdistys (Association Finlandese pro Interlingua, AFIL, registrate legalmente le 24 de maio 1999 con numero 176608). 

Allan Kiviaho es maritate con Brita-Lisa. Illes ha participate activemente in conferentias e incontros nordic de interlingua. Recentemente illes ha usate multe tempore de esser granparentes.

Revidite: 2006-12-29