Historia de interlingua
Biographias A-Z

Ferenc Jeszenszky

Hungaria
Nascite: 22 de augusto 1932
Morite: 21 de april 2011

Ferenc Jeszenszky, 1993. Photo: Piet Cleij"In casa nos mangia duo vices per die: in le matino e in le vespere. In iste conferentia nos mangia solmente un vice per die: ab le matino usque al vespere."

Le parolas de Ferenc Jeszenszky, representante de interlingua pro Hungaria desde 1981, ha devenite immortal e es repetite a cata assemblea international de interlinguistas.

Ferenc Jeszenszky nasceva in Budapest in 1932. Post haber finite le schola secundari ille studeva le physica al Universitate de Budapest. Ille laborava in varie institutos e faceva su doctorato in 1961. Al fin, ab 1971, ille esseva empleate al Secretariato del Academia Hungare del Scientias, ab le qual ille se retirava le 1 de januario 1996.

In 1971 ille se maritava con Erzsébet.

Ja ab su juventute Ferenc Jeszenszky habeva interesse del linguas planate, ma le linguas que ille incontrava non ganiava su placer, usque ille, al fin in 1980, faceva le cognoscentia de interlingua. Antea ille habeva essite collaborator del "gruppo de esperantologia e interlinguistica" al universitate de Roland Eötvös in Budapest. Ma desde que ille incontrava interlingua, ille esseva su partisano enthusiastic. Erzsébet e Ferenc Jeszenszky esseva active participantes de quasi omne conferentias de interlingua desde 1985.

In 1981 ille deveniva le representante in Hungaria e esseva membro del Consilio General del Union Mundial pro Interlingua desde 1982. In 1987 ille functionava como interimari redactor del magazin Currero, usque illo fusionava con Heraldo de Interlingua e deveniva ab januario 1988 Panorama. Ab 1989 ille substitueva Frank Esterhill, SUA, como secretario general del Union Mundial pro Interlingua, plenante le posto usque 1991, quando le nederlandese Piet Cleij deveniva nove secretario general.

Linguas e linguistica es themas super le quales Ferenc Jeszenszky esseva un experto. Ille sovente se misceva in debattos linguistic e esseva sovente consultate per collegas qui besoniava consilios de isto o illo. Ille ha anque livrate multe articulos pro le magazines de interlingua super linguas e linguistica. E in 1987 appareva su version hungare del famose manual "Interlingua" per fil. mag. Ingvar Stenström, Svedia.

Ferenc Jeszenszky habeva ante 12 annos un operation cardiac de "bypass" quadruple e viveva un vita active usque le fin. Ille moriva subito de un clausura quasi total del arterias coronari del corde.

Ferenc Jeszenszky perdeva su sposa, Erzsébet, le 5 de novembre 2006. Illes ambes assisteva in plure conferentias international de interlingua con bon humor e grande ingagiamento. Illes non habeva infantes.

Ferenc Jeszenszky esseva interrate in le cemeterio de Törökbálint, le village in le agglomeration de Budapest ubi Erzsébet nasceva in 1942, le 11 de maio 2011.

Revidite: 2011-05-27