Skip navigation.
Home

Bulgaria organisa le plus alte conferentia de interlingua

|


Visita le pagina official del 19ne Conferentia International de Interlingua

Le citate con le plus grande numero de dies con sol invita a un conferentia international in le montes con temperaturas agradabile in julio 2011.

UMIScheda de inscription  Le 19e Conferentia International de Interlingua deveni le conferentia le geographicamente plus alte in le historia de interlingua.

In le belle, verde e fertile montes Rodopi in le sud de Bulgaria, le citate montan Chepelare a 230 km al sud del capital Sofia e circa 1.200 metros supra le nivello del mar va reciper le participantes de tote le mundo pro un septimana de e in interlingua le 23-30 de julio 2011.

Le Union Mundial pro Interlingua (UMI) es, como sempre, le arrangiator del conferentia international, iste vice in collaboration con le Academia Interlinguistic Bulgare.

Le secreto le plus ben guardate de Europa
Chepelare es appellate "le secreto le plus ben guardate de Europa". Chepelare es in le hiberno un ben cognoscite centro pro skiar. In le estate illo es un placente loco pro reposar o ambular in le montes, e gratias al altitude le temperaturas es agradabile - durante le conferentia probabilemente 20-25 grados - e non si grande como in le altere partes del pais. Chepelare es le citate con le plus multe sol in Bulgaria, estimate a 270 dies per anno. Illo ha un population de circa 8.900 personas.

Le region es multo pittoresc e vicin a Grecia. Le paisage con su cavos natural fornira bon opportunitate pro excursiones interessante.

Hotel de quatro stellas
Es le secunde vice que Bulgaria essera hospite de un conferentia de interlingua. Le prime vice esseva in Lovetch in 2003.

On arriva pro le 19e Conferentia International de Interlingua sabbato le 23 de julio, e le conferentia finira un septimana postea, le 30 de julio.

Le centro conferential es un hotel de quatro stellas que assi ha cameras con ducha e toiletta in omne cameras.

Le hotel offere accesso a Internet sin pagar plus e es in ultra equipate con le medios moderne pro conferentias.

Un programma pro le conferentia de interlingua es sub developpamento e va esser publicate in www.interlingua.com/conferentia/2011, ubi on pote sequer le preparationes e reciper sempre plus de informationes super le conferentia e le location.

Excursiones - e transporto local - includite
Le precio include pernoctation, repastos (le prime repasto includite es le lunch al 23 de julio - le ultime le lunch al 30 de julio) e excursiones. Illo anque include le transporto del capital Sofia a Chepelare, si on arriva inter le horas que le organisatores va annunciar le plus tosto possibile, e retro de Chepelare a Sofia, similemente intra le horas a venir.

Il es multo recommendate que on se inscribe si tosto como possibile.

Con le inscription on debe pagar un deposito de 90 euros per persona.

Internet:
Le guida official touristic: www.chepelare.com.
Le scheda de inscription: Scheda de inscription (in formato PDF).
Le pagina del 19e Conferentia International de Interlingua: www.interlingua.com/conferentia/2011.

BULGARIA
Mappa de Europa
Situate in Europa de Sudest con frontieras a Romania, Serbia, Macedonia, Grecia, Turchia e le Mar Nigre. Area: 110.879 km2 (le pais numero 104 in le mundo). Population: 7,14 mio. (julio 2010). Lingua official: Bulgaro (in familia con macedono), usa litteras cyrillic. Desde 2007 un membro del Union Europee. Le valuta es lev (plural: leva) e consiste de 100 stotinki; 1 lev es circa 0,5 euros; altere valutas non pote immediatemente esser usate.
    
CHEPELARE
Situate vicin al Riviera Chepelare 230 km al sud del capital Sofia, 80 km de Plovdiv (le secunde plus grande urbe in Bulgaria) e 22 km del centro de districto Smolyan. Del 384 km2 que coperi le region, 73 pro cento es forestes, 14 pro cento paisage platte e 11 pro cento paisage agricultural. Milles de touristas de Bulgaria e del estraniero visita cata anno Chepelare que recipe cata anno 30-80 cm de nive que sole remaner pro 80-100 dies. Illo ha circa 270 dies con sol per anno. Le estate sole esser fresc e agradabile. Le citate celebrava su 300esime anniversario in 2005.

Mappa de Chepelare

Initio del pagina