Participa in Praga: Scheda de inscription pro le 23e conferentia international de interlingua



Le capital tchec essera urbe hospite del 23e conferentia international de interlingua in septembre 2019.

UMIPraga essera le hospite del 23e conferentia international de interlingua in un anno.

Le Consilio General del Union Mundial pro Interlingua (UMI) ha univocamente approbate le collaboration con le nove Union Tchec pro Interlingua super le arrangiamento.

Ja in decembre 2017, post le successose 22e conferentia international de interlingua in Las Palmas, esseva annunciate le datas – dominica le 22 a venerdi le 27 de septembre 2019 con arrivata le 21 e partita le 28 – ma le location ancora non esseva fixate. Desde alora le UMI ha examinate, con le adjuta de amicos in tote le mundo, possibile urbes hospite pro le arrangiamento que ha loco omne duo annos in annos impar.

Le Union Tchec pro Interlingua offereva le arrangiamento in le capital tchec. Le union esseva fundate le anno passate e ha in breve tempore livrate un serie impressionante de resultatos pro interlingua. Le organisation ha participate in plure expositiones public, e on ha publicate un manual, duo dictionarios e tosto anque un grammatica de interlingua pro omnes qui parla e comprende tcheco.

Le Consilio General del UMI comencia ora le planification detaliate. Il es le spero que on tosto pote annunciar anque le centro conferential.

Praga es un urbe con un longe historia ric. Illo esseva in augusto 1995 le hospite del 12e conferentia international de interlingua. Le arrangiamento esseva placiate in le Universitate de Agricultura in Suchdol, nord-west del centro.

Un structura flexibile pro omnes
Le plano es divider le conferentia in sectiones con le activitates le plus intensive durante le prime tres dies, pois officinas practic de labor con interlingua, tourismo e le latere plus social. Isto face possibile, que illes qui non ha tempore o dispone de tante dies de vacantias pote prender participation active pro le movimento de interlingua per participar dedicatemente.

"Con le experientia del successose conferentia de 2017 in Las Palmas, nos repetera un structura flexibile, que permittera le contribution de membros qui non pote assister al totalitate del conferentia. Le blocos del structura gruppa le presentationes in duo o tres dies, e lassa le labor de workshops e activitates social pro le altere dies," explicava Julian Mendez, le secretario general del UMI, in decembre.

Plus de detalios super le programma e su contento va apparer in Panorama e in www.interlingua.com. Primo le organisatores va crear le grande schizzo e demandar propositiones de sessiones, officinas de labor, discursos/presentationes etc.