Julian Mendez, 41 annos, ha laborate con interlingua durante multe annos e es ora secretario general del organisation international.

UMILe Union Mundial pro Interlingua (UMI), que ha membros e representantes in cinque continentes, ha eligite su nove secretario general.

Julian Mendez de 41 annos assume le 1 de octobre 2014 le posto del organisation mundial que promove le international lingua auxiliar interlingua pro facer lo plus cognoscite e plus usate. Ille se ha interessate activemente pro interlingua durante multe annos e debe ora presider le effortios de augmentar le presentia public e assi le visibilitate del UMI e de interlingua in un stricte collaboration con le rete de representantes e organisationes national.

Barbara Rubinstein e Julian Mendez, 2014
Barbara Rubinstein, presidente del Societate Svedese pro Interlingua (e ex-presidente del Union Mundial pro Interlingua 2001-2010), e le nove secretario general del UMI, Julian Mendez, durante le 20me conferentia international de interlingua e 14te incontro nordic de interlingua in Svedia in julio 2014. Photo: Thomas Breinstrup

Julian Mendez, qui nasceva in Argentina ma habita desde plure annos in Dresden, Germania, ubi ille studia in le Universitate Technic, esseva unanimemente eligite per le Consilio General del UMI. Ille substitue Paolo Castellina de Grande Britannia, qui ante un anno annunciava su desiro de resignar del posto a causa de labores professional, quando un successor esseva trovate. Paolo Castellina continuava al posto, que ille assumeva le 6 de augusto 2012.

Isto es le prime vice desde le fundation del UMI ante 59 annos que le secretario general veni de America del Sud.

Julian Mendez faceva su studios de Maestro in Logica Computational in le Libere Universitate de Bolzano-Bozen (Italia) e ora in le Universitate Technic de Dresden. Ille es architecto e disveloppator de software e labora in Logicas de Description. Ille anque es interessate in le mathematica, le scientias natural e in le linguistica.

Le nove secretario general del UMI parla interlingua, anglese, espaniol, italiano e apprende germano. Ille ha durante plure annos laborate con interlingua que ille parla fluentemente, e multes le cognosce como un del administratores del encyclopedia in linea Wikipedia in interlingua (http://ia.wikipedia.org). Durante le 20me conferentia international e 14te incontro nordic de interlingua in Svedia in julio 2014, Julian Mendez co-presentava le wikipedia durante plure sessiones.

Ille anque participava in le incontro nordic de interlingua in Svedia in 2012, ubi ille registrava un breve film de presentation de interlingua in espaniol. In ultra, ille produceva ante alcun annos un corrector orthographic de interlingua pro le navigator Mozilla Firefox.

Julian Mendez es un homine structurate, appreciate pro su attitude calme e agradabile e con bon humor. In ultra, ille es musical.

Como secretario general, Julian Mendez entra in le Consilio Executive del UMI que prende cura del affaires quotidian del organisation que esseva fundate in julio 1955. Le Consilio Executive consiste in ultra de Sven Frank (Germania) como presidente, Martijn Dekker (Nederland) como vice-secretario, Alberto Mardegan (Finlandia) como administrator e Thomas Breinstrup (Danmark) como le redactor del magazin international de novas Panorama in interlingua.

Le UMI esseva establite in julio 1955, quatro annos post le apparition de interlingua. Le UMI es juridicamente registrate presso le autoritates francese.


Le Union Mundial pro Interlingua (UMI), establite le 28 de julio 1955 pro diffunder le international lingua auxiliar interlingua, es un institution pro cooperation international con membros e representantes in cinque continentes. Le UMI esseva registrate juridicamente como association numero 0911004931 per le autoritates francese le 3 de augusto 2006. Le Consilio Executive es responsabile pro le functiones quotidian del UMI. Le Consilio General fixa le strategia e labor al longe lineas. Le UMI publica desde januario 1988 le international magazin de novas Panorama in interlingua (ISSN 0903-2932) omne duo menses. Interlingua esseva publicate in 1951 per le International Auxiliary Language Association (IALA).