Viagia a Svedia con tote le familia pro le combinate incontro nordic e conferentia international le 29 de julio al 3 de augusto - un septimana extraordinari in bon compania e con interlingua de matino al vespere pro incontrar amicos, apprender e conversar in interlingua, ir a excursiones e esser inspirate a esser creative.

    Inscribe vos ante le 5 de junio 2014 pro reducer le precio

  • Veni 6 dies al "superconferentia nordic" o "festival de interlingua" pro solmente 4.000 SEK/444 EUR.
  • Toto es includite in le pacco: omne repastos + camera con 5 noctes + cursos + excursiones + belle natura vicin al mar + agradabile participantes ab multe paises pro solmente 4.000 coronas svedese/444 euros per persona (ab lunch le 29 de julio al lunch le 3 de augusto, inclusive).
  • Usa le scheda de inscription e inscribe vos al plus tarde le 5 de junio 2014. Alora tu obtene un reduction de 500 SEK/44 EUR per persona. Assi le precio es solmente 3.500 SEK/400 EUR per persona pro omne sex dies.

  Le grande evento del estate de interlingua habera loco poc metros ab le mar in le ambiente belle del citate balneari Åsa al sud de Göteborg in Svedia, e illo deveni un ver experientia pro tote le familia, quando le 20me conferentia international de interlingua essera combinate con le 14te incontro nordic de interlingua del 29 de julio al 3 de augusto.

Illo non deveni un incontro o un conferentia como nos los cognosce. Con le Societate Svedese pro Interlingua como arrangiator principal e con supporto del Union Danese pro Interlingua, del Union Norvegian pro Interlingua e del Association Finlandese pro Interingua on ha create un totalmente differente arrangiamento estive, un sorta de "superconferentia nordic" o forsan mesmo un "festival de interlingua" pro omnes, qui ama incontrar altere usatores de interlingua ab diverse paises.

Lege plus: www.interlingua.dk/nordic2014 (con programma preliminar) ■
Scheda de inscription

Un bon tempore in bon compania
Iste anno le labor "seriose" essera minus dominante pro in vice crear un bon tempore insimul con tempore pro reposar in bon compania, pro conversar (multo ... e preferibilemente in interlingua, naturalmente), participar in excursiones interessante in le area, pro audir presentationes e discursos interessante (in interlingua ma non necessarimente super interlingua) e simplemente haber sex bon dies insimul, sperabilemente con tote le familia como participantes.

Ma il habera naturalmente multe tempore pro esser inspirate e esser creative, e durante sessiones specific on va discuter initiativas e possibilitates pro facer interlingua plus cognoscite e plus usate internationalmente como in le paises nordic. On va haber un rapide supervista de lo que occurre actualmente, e le planos pro le tempore usque le estate 2015 anque essera discutite. E on pote sempre trovar un tabula o un banco durante le multe pausas e discuter su proprie projectos e ideas con alteres e, sperabilemente, obtener un mano pro exequer los.

Duo cursos pro nove usatores e le plus experientiates
Il habera un curso pro omne nove usatores de interlingua e un curso de conversation pro omnes qui ja cognosce interlingua un poco (o multo), e qui essera defiate a vermente usar le lingua e parlar super nove themas, assi que on pote allargar su vocabulario in un maniera amusante.

Pro exploitar que nos es multes al mesme loco, es arrangiate minor labores in gruppos super themas excitante e amusante, ubi omnes pote participar e crear resultatos immediatemente.

Åsa es bellemente situate in le region Halland al costa west de Svedia e es evidente pro un sojorno de estate pro esser inspirate, obtener nove energia e enthusiasmo e occupar se con interlingua al mesme tempore. Naturalmente nos anque va haber excursiones pro visitar locos interessante in le vicinitate.

E alora il habera multe tempore pro "conversationes creative" sin programma.

Dunque inscribe vos immediatemente. Attende un grande experientia agradabile e commode pro tote le familia.

Visita www.interlingua.dk/nordic2014 pro leger plus e sequer le novas le plus recente e usa le scheda de inscription immediatemente.