Duo facies ben cognoscite entra in nove postos pro fortificar le labor intensive de promover interlingua in tote le mundo.

UMI  Le organisation mundial pro interlingua ha eligite un nove presidente e un nove secretario general, qui va continuar le labor offensive de fortificar e promover interlingua.

Le Union Mundial pro Interlingua (UMI), que ha membros e representantes in cinque continentes, ha desde le 1 de novembre le germano Sven Frank como nove presidente e le portugese Carlos Soreto como nove secretario general. Illes esseva unanimemente eligite per le Consilio General del UMI, cuje representantes de tote le organisationes national de interlingua se occupa del strategia a longe vista del UMI.

Active secretario general deveni presidente

Sven FrankSven Frank, 35 annos, ha desde le 1 de septembre 2008 essite le secretario general del UMI, un posto que ille ha plenate con ardor e labor intense. Ille assi esseva le arrangiator principal del 18ve conferentia international de interlingua in Kirchheimbolanden, Germania, in julio 2009.

Ille substitue le svedese Barbara Rubinstein, qui desde 2001 ha presidite le UMI e ha contribuite a modernisar le organisation facente lo plus active. Barbara Rubinstein, 56 annos, ha durante un anno desirate retirar se pro dar spatio a nove fortias ma voleva remaner sur su posto usque le appunctamento de un successor. Illa e Sven Frank ha collaborate intensivemente durante le passate duo annos.

Sven Frank es educate hypnotherapista e gere su proprie firma in Germania, ICHP Deutschland in Mannheim. Ille habita in Baden-Baden in le sudwest de Germania con su amica Corina, su filio Leo e le filio Felix de su amica. Leo, qui ha tres annos, ha desde su nascentia apprendite interlingua.

Le energic e humoristic Sven Frank es cofundator e presidente del Union German pro Interlingua, establite le 28 de julio 2009. Ille remane presidente del UGI.

Ille ha parlate interlingua desde 2002 e parla in ultra anglese, francese, espaniol e svedese. Ille ha participate desde 2008 in le incontros nordic e le conferentias international de interlingua e se ha ingagiate intensivemente in le diffusion de interlingua pro professionalisar le labor. Ille ha traducite numerose textos in interlingua, i.a. contos de su compatriotas, le fratres Grimm, e ha justo finite le labor con le nove version german del manual le plus traducite in le mundo, "Interlingua - instrumento moderne de communication international" per le mag. phil. Ingvar Stenström de Svedia. Ille ha anque scribite plure libros professional de hypnotherapia.

Ben structurate in su labores

Carlos SoretoLe nove secretario general, Carlos Soreto de 49 annos, anque es un facie cognoscite in le mundo de interlingua. Ille, qui habita in le urbe Tocha vicin a Porto in le nord de Portugal, se ha occupate con interlingua durante plure annos ma esseva fortemente inspirate per su participation in le 18ve conferentia international de interlingua in Kirchheimbolanden, Germania, in julio 2009.

In januario 2010 ille esseva appunctate nove representante de interlingua in Portugal, un posto que ille mantene post su appunctamento.

Carlos Soreto es programmator professional de computatores e aranea de paginas web. Ille esseva educate in linguistica e disciplinas del area del scientias social e ha un vivide interesse pro labyrinthos. In ultra ille ama scriber textos original e traducite, practica karate-do, joca chacos e tarot e ama bicyclar. Ille ha un grande interesse anque in arte, historia, mythologia e le symbologia del labyrintho, e alora ille ama photographiar. Musica classic, jazz, le portugese fado e le "musica mundial" anque es appreciate. Ille parla portugese como lingua materne e in ultra francese, anglese e germano.

Carlos Soreto ha durante 1½ annos contribuite con su pagina enigmatic "Labyrintho" in Panorama in interlingua, le magazin de novas publicate per le UMI. Su maniera de laborar es structurate e strategic, facultates del quales le UMI va ora gauder. Al mesme tempore ille ha un bon humor e es capace de rapidemente obtener un supervista.

Electiones historic

Le Consilio Executive ora consiste de Sven Frank, Germania (presidente), Carlos Soreto, Portugal (secretario general), Martijn Dekker, Nederland (vice-secretario), Alberto Mardegan, Finlandia (tresorero) e Thomas Breinstrup, Danmark (redactor de Panorama in interlingua).

Il es le prime vice in le historia del UMI que un germano es presidente e un portugese secretario general del organisation.

Le UMI esseva establite in julio 1955, quatro annos post le apparition de interlingua. Le UMI es juridicamente registrate presso le autoritates francese.

Interview con le nove presidente e secretario general: Ascolta le interview con Sven Frank e Carlos Soreto in Radio Interlingua