Frits Goudkuil ha morite

  Frits Goudkuil, le fundator del Servicio de Libros UMI in Nederland e durante multe annos consiliero del Union Mundial pro Interlingua, moriva in le vespere le 19 de septembre, 90 annos de etate.

Que le magazin official de novas del UMI, Panorama in interlingua, iste anno celebra su 20-esime anno de publication es debite i.a. a Frits Goudkuil. Durante annos ille insisteva que on debeva unir le fortias de interlingua pro un singule magazin, plus grande que le magazin del Union Mundial pro Interlingua a ille tempore, le Currero. E Frits Goudkuil voleva – como imprimitor professional – imprimer lo. Assi Panorama appareva como un fusion de Currero e le private Heraldo de Interlingua in januario 1988.

Frits Goudkuil, nascite le 13 de februario 1917, fundava in 1972 le Servicio de Libros UMI (e assi appellate mesme »Sir Fritsio«, proque ille in modo nederlandese sempre pronunciava le -v- como un -f-). Ille videva interlingua in 1955 e poneva desde alora energia e moneta in producer libros e magazines. Ille mesme ha publicate plure libros in interlingua (sub pseudonymo), mesmo si ille sempre sublineava que su profession esseva imprimer, non scriber. Sin su ingagiamento, le litteratura in interlingua non esserea si ample e ric como es le caso hodie.

Le Drukkerij Goudkuil continua imprimer Panorama omne duo menses, ma hodie su filio Frank e le filia affin Renate gere le commercio. Frits Goudkuil (litteralmente »fossa de auro«, mesmo si ille sempre »plangeva« de non devenir ric per su activitates pro interlingua) deveniva malade ante alcun annos e non plus esseva active pro interlingua.

Su humor charmante e attitude ingagiate totevia ha durante le annos e le conferentias de interlingua essite altemente appreciate per le mundo de interlingua. Su effortios pro le lingua ha essite importantissime pro le promotion de illo.

Que vive su memoria!